Obama kezeńindegi Aq úıdiń áleýmettik jelidegi akkaýnty buzyldy
ASTANA. KAZINFORM — AQSh-tyń burynǵy prezıdenti Barak Obama ákimshiligi kezinde paıdalanylǵan Aq úıdiń Instagram jelisindegi resmı akkaýnty buzylǵany belgili boldy, dep habarlaıdy Anadoly.
TMZ basylymynyń málimetinshe, atalǵan akkaýnttaǵy sońǵy jarııalanym 2017 jyly jarııalanǵan. Sodan beri jańartylmaǵan paraqsha belgisiz tulǵalardyń qolyna ótip, onda birneshe jazba jarııalanǵan kórinedi.
Habarlamada jarııalanǵan jazbalardyń birinde Aq úıdiń shııtterdiń baqylaýynda ekeni týraly málimdemeler bolǵany aıtylǵan. Sonymen qatar akkaýntty buzǵandar Instagram Stories bóliminde de túrli materıaldar jarııalaǵan.
Jarııalanǵan sýretterdiń birinde 2020 jylǵy 3 qańtarda Baǵdad mańynda amerıkalyq ushqyshsyz apparattyń soqqysynan qaza tapqan ırandyq general, Kasem Súleımanıniń fotosy qoldanylǵan.
Instagram áleýmettik jelisiniń ıesi Meta ókili akkaýnttyń buzylǵanyn rastady. Kompanııa ókilderiniń aıtýynsha, akkaýnt qaıta qorǵalyp, ruqsatsyz jarııalanǵan barlyq kontent óshirilgen.
Qazirgi ýaqytta akkaýntty kimniń buzǵany belgisiz.
Budan buryn AQSh prezıdenti Donald Tramp burynǵy prezıdent Barak Obamany 2016 jylǵy prezıdenttik saılaýda alaıaqtyq jasady dep aıyptady.
Óz kezeginde Obama Tramptyń memleketke opasyzdyq jasady degen málimdemesin joqqa shyǵardy.
Tramp Aq úıden Obama men Býshtardyń portretterin kózden tasa jerge aýystyrǵany belgili boldy.
