Obama eki merzimge prezıdent bolǵysy keletinin moıyndady
ASTANA. Qarashanyń 6-sy. QazAqparat - Barak Obama Aq úıde ekinshi merzimge de qalýǵa nıeti bar ekenin aıtyp qaldy.
«Kelesi 8 jylda, eń bolmaǵanda, kelesi 4 jylda, naqtyraq aıtqanda 3 jyl 1 aıda qazirgi jumys ornyma senimdimin, jáne biz ınfraqurylym qurý isine jańa qarqyn berý, ózara qarym-qatynastardyń jańasha túrlerin qurý úshin qolymyzdan kelgenniń bárin isteýge tyryspaqpyz», dep málim etti Obama beısenbi kúni AQSh-tyń baıyrǵy halyqtary kóshbasshylarynyń konferentsııasynda.
Obama keshe prezıdent bolyp saılanýynyń 1 jyldyǵyn atap ótti. Al prezıdenttiginiń 1 jylyn ol qańtardyń 20-da, ınaýgýratsııanyń bir jyldyǵy kúni atap ótedi. Kelesi prezıdenttik saılaý AQSh-ta 2012 jyldyń qarasha aıynda bolady.
