Obama baı amerıkandyqtar úshin salyqty kóbeıtýdi uıǵardy
ASTANA. QazAqparat - AQSh Prezıdenti Barak Obama amerıkandyq zań shyǵarýshylarǵa eldiń salyq kodeksine birneshe ózgeris engizýdi usynbaqshy. Solardyń biri - baı turatyn amerıkandyqtar úshin salyqty kóbeıtý, dep habarlaıdy RBK.
AQSh Prezıdenti óziniń bastamalary týraly kelesi aptada ótetin Kongreske jyl saıynǵy joldaýynda jarııalaıdy.
Obama zań shyǵarýshylarǵa jylyna 500 myń dollardan astam tabys tabatyn azamattar úshin salyq mólsherlemesin qazirgi 23,8 paıyzdan 28 paıyzǵa deıin ósirý usynysyn jasamaq. Basylymnyń eske salýynsha, qazirgi 23,8 paıyz mólsherlemesin de kezinde Obama ornatqan. Buǵan deıin ol 15 paıyzdy quraǵan bolatyn.
Budan basqa, Obama muragerlikke baǵaly qaǵazdardy alǵan amerıkandyq azamattarǵa da salyq salý usynysyn jasamaqshy. Bul ózgerister el azamattar sanynyń 1 paıyzdan aspaıtyn úlesine tıesili bolady.
AQSh Prezıdentiniń usynystary Kongrestiń eki palatasynda da sany kóp respýblıkalyqtardyń qarsylyǵyna tap bolatyny shamalanyp otyr.
