«Oazıs» kórkem fılmi prokatqa shyǵady
«Búgingi qazaq qoǵamy tildik, dindik turǵydan ekige bólinip jatyr. Qazaq qazaqty túsinbeı jatyr, bul ultymyzdyń tragedııasy. Bul tragedııany biz «Oazıs» fılmindegi keıipkerleri arqyly - dalada kezdesken eki qazaqtyń qaqtyǵysy arqyly kórsetýge tyrystyq. Biri - dini de, tili de, tarıhy da buzylmaǵan, oralman jigit bolsa, ekinshisi - Almatydaǵy balalar úıinde tárbıelengen, dini de joq, tili de joq, tarıhı jady da joq Rýslan esimdi shala qazaq. Jalpy, «Oazıs» - din taqyrybyn qozǵap, ımany buzylǵan qazaq qoǵamy úshin ımannyń qanshalyqty mańyzdy ekenin kıno tilimen aıtýǵa umtylǵan fılm», - dedi fılmniń stsenarıı avtory, belgili jazýshy Smaǵul Elýbaı.
«Oazıs» fılminiń negizgi túsirý jumystary Almaty oblysy Shonja aýylynda, sonymen qatar Almaty qalasynda júrgizildi. Fılmdegi basty róldi T.Júrgenov atyndaǵy Qazaq Ulttyq óner ınstıtýtynyń túlegi Aıdar Asarbaı somdady.
Aıta ketsek, «Oazıs» fılmi rejısser Begars Elýbaıdyń alǵashqy jeke jumysy. Onyń aldynda ol rejısser Erlan Nurmuhambetovpen birge balalarǵa arnalǵan «Ańshy bala» fılmin (2012 jyly jaryqqa shyqqan) túsirgen bolatyn. Búginde rejısser «Bala ǵashyq» atty kelesi fılmdi túsirip jatyr.
Fılmde ómirge degen kózqarastary bir-birine uqsamaıtyn, minezderi de múldem bólek eki jigittiń taǵdyry baıandalady. Rýslan - ananyń meıirimin kórmegen tastandy bala. Polıtsııa qyzmetkerlerinen qashyp júrgen ol ózimen birge búkil álemdi joıyp jibermek oıy bolady. Alaıda shóldi dalada ol júreginde ımany bar, tóńiregindegilerdi mahabbat pen meıirimdilik nuryna bólendirip júrgen jigitti kezdestiredi.
