OAR bıligi Tramptyń eldi G20 sammıtinen shyǵarý týraly qoqan-loqqysyna ún qatty

ASTANA. KAZINFORM — Ońtústik Afrıka Respýblıkasy AQSh prezıdenti Donald Tramptyń óz ókimimen eldi 2026 jyldyń jeltoqsanynda Maıamıde ótetin G20 sammıtine shaqyrmaıtyny týraly málimdemesine qatań jaýap qatty, dep habarlaıdy DW.

OAR prezıdenti Sırıl Ramaposa eldiń «egemen, demokratııalyq jáne konstıtýtsııalyq memleket» ekenin atap ótip, ózderine baǵyttalǵan «qorlaýdy» qabyldamaıtynyn aıtty.

Ramaposa Tramptyń OAR-ǵa qatysty «jaza sıpatyndaǵy sharalar» qabyldap otyrǵanyn ókinishti jaǵdaı dep baǵalady. Onyń aıtýynsha, bul qadamdar AQSh-pen qarym-qatynasty jaqsartý úshin jasalǵan kúsh-jigerge qaramastan jáne «jalǵan aqparat pen burmalaýǵa» negizdelip otyr.

Prezıdent ákimshiligi 21–22 qarasha kúnderi Iohannesbýrgte ótken G20 sammıtine AQSh-tyń óz delegatsııasyn jibermegenin eske salyp, alaıda basqa qatysýshylar bul jıyndy tabysty ótti dep baǵalap, kópjaqty yntymaqtastyqtyń mańyzyn rastaǵanyn aıtty.

Buǵan deıin Tramp OAR-dy Iohannesbýrgtegi sammıt aıaqtalǵannan keıin G20-ǵa tóraǵalyqty rotatsııa tártibimen AQSh-qa tıisinshe tapsyrmaǵany úshin synǵa alǵan edi. OAR bıligi tóraǵalyqty AQSh elshiliginiń qyzmetkerine tapsyrǵanyn, sebebi kezdesýge amerıkalyq joǵary laýazymdy ókilder qatyspaǵanyn aıtyp túsindirdi.

26 qarasha kúni Tramp Truth Social jelisinde málimdeme jarııalap, OAR úkimetin afrıkanerler men eýropalyq qonystanýshylardyń ózge urpaqtaryna qatysty adam quqyqtarynyń buzylý máselesin moıyndaýdan jáne sheshýden bas tartty dep aıyptady. Onyń aıtýynsha, aq násildi halyq qyrǵynǵa ushyryp, jerinen de aırylyp otyr. Osyǵan baılanysty ol OAR-dy Maıamıde ótetin sammıtke shaqyrmaýdy jáne elge beriletin «barlyq tólemder men sýbsıdııalardy» toqtatýdy tapsyrǵanyn málimdedi.

Ońtústik Afrıka bıligi aq násildi halyqtyń quqyqtary buzylyp jatyr degen aıyptaýlardy joqqa shyǵardy. Ramaposa elde zorlyq-zombylyq deńgeıiniń joǵary ekenin moıyndaı otyryp, qylmys qurbandarynyń basym bóligi qara násildi turǵyndar ekenin atap ótti.

Sondaı-aq AQSh bosqyndardy qabyldaý jyldyq lımıtin 125 000-nan 7 500-ge deıin qysqartqan jáne kvotanyń basym bóligin OAR-dyń aq násildi azamattaryna arnaǵan. Mamyr aıynda AQSh mundaı bosqyndardyń alǵashqy tobyn qabyldady. Ol kezde Tramp AQSh «negizinen zorlyq-zombylyqtan qashqan adamdarǵa azamattyq berdi» dep málimdegen-di.

Eske sala keteıik, buǵan deıin Tramp kelesi jyly ótetin G20 sammıtine Ońtústik Afrıkany shaqyrmaıtynyn málimdedi. Onyń aldynda G20 sammıti alǵash ret Afrıka qurlyǵynda ótip jatqanyn jazdyq.