OAR bıligi tek palestınalyqtar mingen ushaqtyń elge qalaı kelgenin tergep jatyr

ASTANA. KAZINFORM — Ushaq Iohannesbýrgtegi O.R.Tambo atyndaǵy áýejaıǵa qonǵan, biraq olardyń attanǵan elden jolǵa shyǵý mórleri bolmaǵandyqtan bastapqyda jolaýshylarǵa elge kirýge ruqsat berilmedi. Sonyń saldarynan olar ushaq ishinde 10 saǵattan astam ýaqyt ótkizgen, dep habarlaıdy VVS.

Prezıdent Sırıl Ramafosanyń aıtýynsha, keıin jolaýshylardyń kópshiligi jergilikti qaıyrymdylyq uıymynyń aralasýynan keıin jáne «meıirimdilik pen gýmanızm turǵysynan» Ońtústik Afrıka Respýblıkasy aýmaǵyna kirgizilgen.

Olardyń Gazadan qalaı shyqqany jáne Ońtústik Afrıkaǵa qalaı jetkeni ázirge belgisiz. Bul faktiler resmı tergeý nysanyna aınalady.

Kútpegen qonaqtar

Ońtústik Afrıka HAMAS pen Izraıl arasyndaǵy soǵys kezinde palestınalyqtardy tabandy túrde qoldap keledi.

Ramafosanyń aıtýynsha, 153 adamnan turatyn top «qupııa jaǵdaıda ushaqqa otyryp, Naırobıde aıaldap, OAR-ǵa kelgen», dep habarlaıdy News24 portaly.

Gaza sektorynan shyǵý beketterin baqylaıtyn Izraıldiń COGAT vedomstvosy turǵyndar anklavty «úshinshi el olardy qabyldaýǵa keliskennen keıin» tastap shyqqanyn málimdedi, biraq ol eldiń atyn atamady.

Pretorııadaǵy Palestına elshiliginiń dereginshe, jolaýshylar Izraıldegi Ramon áýejaıynan ushyp shyǵyp, Naırobı arqyly OAR-ǵa baǵyt alǵan. Elshilik munyń «eshqandaı aldyn ala habarlamasyz jáne úılestirýsiz» jasalǵanyn aıtady.

Elshilik málimdemesinde «tirkelmegen ári kóptegen suraq týdyratyn uıym» gýmanıtarlyq daǵdarysty óz múddesine paıdalanyp, otbasylardy aldap, aqsha jınap, sapardy zańsyz ári jaýapsyz túrde uıymdastyrǵany aıtylǵan.

«153 jolaýshynyń 23-i basqa elderge qaraı jolyn jalǵastyrǵan, al 130 adam OAR aýmaǵyna jiberilgen», dep habarlady jergilikti bılik.

Ramafosa ishki ister mınıstrinen jaǵdaı týraly aqparat alǵanyn jáne adamdardy keri qaıtarmaý týraly sheshim qabyldaǵanyn atap ótti.

Eske sala ketsek, buǵan deıin Ońtústik Afrıkadaǵy Stılfonteın shahtasynan 78 zańsyz kenshiniń denesi tabylǵanyn jazdyq.