OAK-da kezekten tys attestattaýdan ótken 508 qyzmetkerdiń 63-i alyp otyrǵan qyzmetterine saı emes - Qarjy polıtsııasy
ASTANA. 7 tamyz. QazAqparat - Qarjy polıtsııasynda qyzmetkerlerin kezekten tys attestattaýdyń ekinshi kezeńi aıaqtaldy.
Bul týraly vedomstvonyń baspasóz qyzmetinen málim etti.
Ortalyq apparattyń jáne taǵaıyndalýy Agenttiktiń nomenklatýrasyna kiretin aýmaqtyq qarjy polıtsııasy oragandary men Qarjy polıtsııasy akademısynyń qyzmetkerleri attestattaýdy Agenttik janyndaǵy Ortalyq attestattaý komıssııasynda ótti.
Osy komıssııada attestattaýdy 533 qyzmetker ótýi tıis bolatyn, alaıda 19 qyzmetker ortalyq attestattaý komıssııasynyń joǵary talaptaryn bile tura, laýazymdarynan bosatý týraly baıanattar jazyp, attestattaýdan ótýden bas tartty, 2-i Ortalyq áskerı-medıtsınalyq komıssııaǵa qaralýǵa jiberildi, 4 qyzmetker ýaqytsha eńbek qabiletsizdigine baılanysty attestattaýdan ótpedi.
Nátıjesinde Ortalyq attestattaý komıssııasynan 508 qyzmetker ótti, olardyń 283-i Agenttiktiń qyzmetkerleri, 225-i aýmaqtyq departamentter men Qarjy polıtsııasy akademııasynyń qyzmetkerleri.
Attestattaýǵa jatatyn qyzmetkerler Qazaqstan Respýblıkasynyń zańnamasy, oılaý qabilettigin anyqtaýǵa baǵyttalǵan testileýdi jáne áskerı daıyndyq normatıvterin tapsyryp, psıholog mamandarymen suhbattasýdan ótti.
Agenttik tóraǵasynyń tóraǵalyq etýimen Ortalyq attestattaý komıssııasymen ótkizilgen suhbattasý qorytyndysy boıynsha kelesideı nátıjeler alyndy:
1) 52 qyzmetker nemese 10,3% óz qyzmetterine sáıkes keledi jáne kadrlyq rezervke engizý nemese joǵary laýazymdarǵa taǵaıyndalýǵa usynylady;
2) 393 qyzmetker nemese 77,3% laýazymdaryna sáıkes keledi dep tanyldy;
3) 38 - laýazymdaryna sáıkes kelmeıdi jáne tómen laýazymdarǵa taǵaıyndalýǵa usynylady;
4) 16 - laýazymdaryna sáıkes emes jáne basqa qyzmetterge (laýazymdarǵa) aýysýǵa usynylady;
5) 9 qyzmetker laýazymdaryna sáıkes kelmeıdi jáne qarjy polıtsııasy organdarynan jumystan shyǵarýǵa usynylady;
Ortalyq attestattaý komıssııasynda suhbattasýdan ótý barysynda testileý men áskerı daıyndyq nátıjeleri ǵana emes, oǵan qosa qyzmetkerlerdiń jedel jumys nátıjeleri de eskerildi.
Sonymen, Ortalyq attestattaý komıssııasynda attestattaýdy ótken 508 qyzmetkerdiń 63-i nemese 12,4% attestattaýdan óte almady, olardyń 38-i - aýmaqtyq departamentter men Qarjy polıtsııasy akademııasynyń basqarmalary men bólimderiniń bastyqtary.
Kezekten tys attestattaý nátıjesinde aýmaqtyq qarjy polıtsııasy organdarynyń basshylyq quramynyń orta býyny 27% jańartyldy.
Esterińizge salsaq, attestattaýdy ótkizýdiń basty mindeti bolyp qarjy polıtsııasy organdarynyń kadrlik quramyn qoǵamnyń talaptaryna saı óziniń qyzmettik mindetterin tıimdi atqara alatyn qyzmetkerlerden qalyptastyrý tabylady.
Kezekten tys attestattaýdyń kelesi kezeńi - aýmaqtyq qarjy polıtsııasy organdary jáne Qarjy polıtsııasy akademııasynyń janyndaǵy aýmaqtyq attestattaý komıssııalaryndaǵy synaqtar aǵymdaǵy jylǵy tamyzda ótedi. Attestattaýdy aýmaqtyq qarjy polıtsııasy organdary jáne Qarjy polıtsııasy akademııasynyń 2450 qyzmetkeri ótetin bolady.
Qazirgi tańda Qazaqstan Respýblıkasy Premer-Mınıstri jáne Agenttik Tóraǵasymen kelisilgen barlyq 17 aýmaqtyq attestattaý komıssııalarynyń quramdary bekitildi. Olardyń jumysyn aýmaqtyq departamentter jáne Qarjy polıtsııasy akademııasynyń bastyqtary basqarady.
Ashyqtyq pen obektıvtilikti qamtamasyz etý maqsatynda attestatsııalyq komıssııalardyń jumysyna qoǵam jáne buqaralyq aqparat quraldarynyń ókilderi tartylady.
