OA SІM basshylary Qazaqstannyń BUU QK tóraǵalyǵyn talqylaýda
TAShKENT. QazAqparat - Ortalyq Azııa memleketteriniń Syrtqy ister mınıstrlikteriniń basshylary Qazaqstannyń BUU Qaýipsizdik Keńesine tóraǵalyǵyn talqylady, dep habarlady QR Syrtqy ister mınıstri Qaırat Ábdirahmanov Ózbekstan astanasynda ótken «Qazaqstan-Ózbekstan-Tájikstan-Túrkmenstan-Qyrǵyzstan» bes baǵytty kezdesýden soń, dep habarlaıdy «QazAqparat» HAA-niń menshikti tilshisi.
«Qazaqstannyń BUU-nyń Qaýipsizdik Keńesine múshe bolýyna baýyrlas memleketter men Ortalyq Azııa elderi erekshe qyzyǵýshylyq tanytyp otyrǵany belgili. Olar bizge saılaýaldy naýqan barysynda úlken qoldaý kórsetti, endi halyqaralyq uıymnyń múshesi retinde bizdiń mindetimiz Ortalyq Azııa atynan ókildik etý bolyp tabylady. Basty másele osynda. Osyǵan baılanysty biz 2016 jyldyń qyrkúıek BUU Bas Assambleıasynyń sessııasynda negizi qalanǵan, Syrtqy ister mınıstrleriniń beıresmı kezdesýin uıymdastyrý dástúrin jalǵastyrdyq. Bul kezdesý Qazaqstannyń bastamasymen uıymdastyrylyp otyr jáne búgin Ortalyq Azııa memleketteri Syrtqy ister mınıstrleriniń ekinshi beıresmı kezdesýi ótti»,-dep atap ótti, Ábdirahmanov.
«Búgin men odaqtastarymyzǵa Qazaqstannyń BUU Qaýipsizdik Keńesine múshe bolǵan 100 kúnde atqarǵan jumystarynan habardar etý mártebesine ıe boldym. Bizge búgin óńir boıynsha seriktesterimizben bolashaq qadamdarymyz boıynsha da pikir almasyp alý qajet. Óıtkeni Qaýipsizdik Keńesinde Ortalyq Azııa elderiniń múddesine qatysty kóptegen máseleler qaralady. Mysal retinde kórshiles Aýǵanstannan keletin transulttyq baǵyttaǵy qaýipterdi alýǵa bolady. Biz bul máseleni jan-jaqty talqyladyq jáne Aýǵanstandy ózimizdiń beıbit ómirdegi sharýashylyq júıesine tartyp, olarǵa osy ýaqytta kezdesip otyrǵan qıyndyqtardy eńseretindeı belsendi kómek kórsetýdi jalǵastyrý qajet dep otyrmyz»,-dedi QR SІM basshysy.
«Qazaqstan 2018 jyldyń qańtarynda BUU Qaýipsizdik Keńesine tóraǵalyq etedi. Osyǵan baılanysty biz Ortalyq Azııa elderiniń ókilderimen tóraǵalyǵymyzdyń kún tártibi boıynsha pikir almastyq. Atap aıtqanda, biz Aýǵanstandaǵy jaǵdaıdy nazarǵa ala otyryp, Ortalyq Azııadaǵy qaýipsizdikti nyǵaıtý taqyrybynda mınıstrlikter deńgeıinde debat uıymdastyrý qajet dep sheshtik. Biz ózimizdiń ortalyqazııalyq seriktesterimizdiń tarapynan kóptegen usynystar men keńesterdi estidik. Olar Memleket basshysy Nursultan Nazarbaevtyń bıylǵy jyldyń qańtar aıyndaǵy Qaýipsizdik Keńesiniń múshelerine joldaǵan saıası Úndeýinde de aıtyldy. Onda Elbasy biz úshin Ortalyq Azııada beıbitshilik pen qaýipsizdiktiń, yntymaqtastyq pen damýdyń aımaǵyn qalyptastyrýdyń basym baǵyttardyń biri bolyp tabylatyndyǵyn atap ótti. Búgin biz áriptesterimizben birge qazaqstandyq tóraǵalyqtyń osy bir basymdyǵyn taǵy qandaı máselelermen tolyqtyrýǵa bolatyndyǵyn taǵy bir talqyǵa saldyq»,-dep atap ótti Ábdirahmanov.
Aıta keteıik, búgin Tashkentte TMD memleketteri Syrtqy ister mınıstrleriniń kezekti májilisi ótip, onda 15 qujat qaraldy. Atalmysh sharada Qazaqstan atynan QR SІM-niń basshysy Qaırat Ábdirahmanov ókildik etti.
