OA men Qytaı qatynasy jan-jaqty strategııalyq seriktestik deńgeıine shyqty - Prezıdent

ASTANA. KAZINFORM – Ortalyq Azııa men Qytaı arasyndaǵy qatynas jan-jaqty strategııalyq seriktestik deńgeıine shyqty. Bul týraly «Ortalyq Azııa – Qytaı» ІІ sammıtinde Memleket basshysy Qasym-Jomart Toqaev aıtty.

- Osy jerde otyrǵan Ortalyq Azııa memleketteriniń ózara senimi men birlesken kúsh-jigeriniń arqasynda shynaıy tatý kórshilik, dostyq pen ózara qoldaý rýhyndaǵy yntymaqtastyqtyń teńdessiz modeli qalyptasty. Osyǵan baılanysty uly memleket qaıratkeri, tóraǵa Sı Tszınpın basshylyq jasaıtyn Qytaıdyń belsendi ári paıdaly rólin atap ótý ádiletti bolar edi. Qazaqstan kórshiles Qytaı atynan máńgi ári senimdi strategııalyq seriktes pen naǵyz dos tapty, - dedi Memleket basshysy.

Prezıdent 80 mln turǵyny bar aýqymdy naryqqa jáne mol tabıǵı resýrstarǵa baı Ortalyq Azııa óńiri halyqaralyq qarym-qatynas pen saýda-ekonomıkalyq, ınvestıtsııalyq jáne gýmanıtarlyq yntymaqtastyqtyń mańyzdy sýbektisi retinde ustanymyn kezeń-kezeńimen nyǵaıtyp kele jatqanyn aıtty.

- Ortalyq Azııa men Qytaı arasyndaǵy qarym-qatynas máńgilik, aýa raıyn talǵamaıtyn, jan-jaqty qamtylǵan strategııalyq seriktestik deńgeıine shyqqanyn zor rızashylyqpen atap ótkim keledi, - dedi Qasym-Jomart Toqaev.

«Ortalyq Azııa – Qytaı» ІІ sammıtine Memleket basshysy Qasym-Jomart Toqaev, QHR tóraǵasy Sı Tszınpın, Ózbekstan Prezıdenti Shavkat Mırzıeev, Qyrǵyzstan Prezıdenti Sadyr Japarov, Túrikmenstan Prezıdenti Serdar Berdimuhamedov jáne Tájikstan Prezıdenti Emomalı Rahmon qatysyp otyr.