OA — Italııa sammıti: Qazaqstan Orta dálizdegi júk tasymalyn eki ese arttyrýǵa nıetti

ASTANA. KAZINFORM — Qazaqstan Orta dáliz arqyly tasymaldanatyn júk kólemin aldaǵy úsh jylda eki ese arttyrýǵa nıetti ekenin jetkizdi.

Prezıdent Qasym-Jomart Toqaev «Ortalyq Azııa — Italııa» birinshi sammıtinde osyndaı málimet keltirdi.

— Aımaqta kólik tehnologııasynyń birlesken kásiporyndaryn quryp, Italııadan óndiristerdi jergilikti ekonomıkada oqshaýlaýǵa qyzyǵýshylyq bar. Bul elderimizge aıtarlyqtaı paıda ákeledi. Bul baǵytta bizde jemisti yntymaqtastyqtyń mysaldary barshylyq. Mysaly, qazaqstandyq zaýyttardyń birinde ıtalııalyq tehnologııa boıynsha aýylsharýashylyǵy tehnıkasyn qurastyrý jolǵa qoıylǵan. Sonymen qatar, ıtalııalyq kompanııanyń qatysýymen kúkirt qyshqyly zaýytynyń, gaz óńdeý zaýytynyń qurylysy bastaldy, — dedi Qasym-Jomart Toqaev.

Prezıdent Qazaqstan aýqymdy ekonomıkalyq reformalardy iske asyryp, zańnamany jetildirý arqyly eldegi ınvestıtsııalyq klımatty odan ári jetildirýge nıetti ekenin atap ótti.

— Taǵy bir ózekti mindet — transqurlyqtyq baılanysty bekemdeý. Transkaspıı halyqaralyq kólik marshrýtyn damytý arqyly bizdiń elder ejelgi Jibek jolyn jańa negizben qaıta jandandyryp jatyr. Byltyr osy dálizdiń Qazaqstandaǵy bóliginde konteınermen júk tasymaldaý kólemi 62 paıyzǵa ósip, 4,5 mln tonnaǵa jetti. Úsh jyldyń ishinde osy kórsetkishti eki eseleýge nıettimiz, — dedi Memleket basshysy.

Aıta keteıik, Elordadaǵy Táýelsizdik saraıynda Memleket basshysy Qasym-Jomart Toqaevtyń qatysýymen «Ortalyq Azııa — Italııa» alǵashqy sammıti ótip jatyr. 

Sondaı-aq, búgin túske deıin Memleket basshysy Qasym-Jomart Toqaev pen Italııa Mınıstrler Keńesiniń tóraǵasy Djordja Melonı Astana halyqaralyq forýmynyń ekinshi kúnindegi plenarlyq sessııaǵa qatysty. 

Budan keıin Qazaqstan Prezıdenti men Italııa Premer-mınıstri Aqordadaǵy kelissóz qorytyndysy boıynsha Strategııalyq seriktestikti keńeıtý jóninde Birlesken málimdeme qabyldaǵan bolatyn.