«OA — Italııa» sammıti: Ashhabadta aımaqtyq klımattyq tehnologııalar ortalyǵy ashylady

ASTANA. KAZINFORM — Túrikmenstan prezıdenti Serdar Berdimuhamedov «OA — Italııa» sammıtinde Ashhabadta BUU aıasyndaǵy aımaqtyq klımattyq tehnologııalar ortalyǵyn ashýdy usyndy.

— Ózara yntymaqtastyq salalarynyń biri — sýtegi energetıkasy. Ózderińiz biletindeı, aldaǵy onjyldyqtarda tabıǵı gaz sýtegi óndirisindegi basym kózderdiń biri bolyp qala beredi. Biz ıtalııalyq seriktestermen osy turǵyda ózara tıimdi yntymaqtastyqqa daıynbyz, — dedi Túrikmenstan prezıdent.

Sondaı-aq, ol kólik logıstıkasy máselelerine nazar aýdardy. Aıtýynsha, Túrikmenstan Azııa-Eýropa dálizine kirigýge múddeli.

— Ashhabadta BBU aıasyndaǵy óńirlik klımattyq tehnologııalar ortalyǵyn qurý jónindegi bastamamyzdy atap ótkim keledi, — dedi Serdar Berdimuhamedov.

Aıta keteıik, elordadaǵy Táýelsizdik saraıynda Memleket basshysy Qasym-Jomart Toqaevtyń qatysýymen «Ortalyq Azııa — Italııa» alǵashqy sammıti ótip jatyr.

Sondaı-aq, búgin túske deıin Memleket basshysy Qasym-Jomart Toqaev pen Italııa Mınıstrler Keńesiniń tóraǵasy Djordja Melonı Astana halyqaralyq forýmynyń ekinshi kúnindegi plenarlyq sessııaǵa qatysty. 

Budan keıin Qazaqstan Prezıdenti men Italııa Premer-mınıstri Aqordadaǵy kelissóz qorytyndysy boıynsha Strategııalyq seriktestikti keńeıtý jóninde Birlesken málimdeme qabyldaǵan bolatyn.