OA elderi Oraza men Qurban aıtty bir kúnge belgileýge kelisti

ASTANA. QazAqparat - Qyrǵyzstan astanasy Bishkek qalasynda Ortalyq Azııa elderiniń múftıleri ortaq memorandým qabyldady. Bul jaıynda Qazaqstan Musylmandary dinı basqarmasynyń baspasóz hatshysy Aǵabek Qonarbaıuly Feısbýktegi paraqshasynda jazdy, dep habarlaıdy QazAqparat tilshisi.

Onyń jazýynsha, memorandýmǵa qol qoıý rásimine Qazaqstan Musylmandary dinı basqarmasynyń tóraǵasy, Bas múftı Serikbaı qajy Oraz, Ózbekstan Musylmandary dinı basqarmasynyń tóraǵasy Osmanhan qajy Alımov, Qyrǵyzstan Musylmandary dinı basqarmasynyń tóraǵasy Maqsatbek qajy Toqtamysov, Tájikstan Respýblıkasynyń Ǵulamalar keńesiniń tóraǵasy Saıdmýkarram Abdýkodırzoda qatysty.

«Qabyldanǵan qujatta Ortalyq Azııada dinı merekelerdi (Oraza, Qurban aıt) bir kúnge belgileý, ortaazııalyq dinı mektepti jańǵyrtý, ortaq salttar men dástúrli joralǵylardy damytý, dinı ekstremızm men terrorızmniń aldyn alý, adamgershilik qundylyqtardy nasıhattaý, tarıhı ortaq nysandarǵa zııarat jasaý, dinı kitaptardy aýdarý jáne basqa da  baǵyttar boıynsha yqpaldasyp qyzmet etý kózdelgen. Múftıler osy baǵyttarda birlese qyzmet etýge ýaǵdalasty», -dep jazady Aǵabek Qonarbaıuly.