OA elderi klımattyq ózara yntymaqtastyqtyń turaqty modelin qalyptastyryp jatyr — sarapshy
TAShKENT. KAZINFORM — Ortalyq Azııa elderi óńirdegi klımattyq ózara yntymaqtastyqtyń turaqty modelin qalyptastyryp jatyr. Mundaı pikirdi Astanada ótken Óńirlik ekologııalyq sammıttiń mańyzyna úńilgen Ózbekstan prezıdenti janyndaǵy Strategııalyq jáne óńiraralyq zertteýler ınstıtýty dırektorynyń birinshi orynbasary Akramjon Nematov bildirdi, dep habarlaıdy Kazinform agenttiginiń Tashkenttegi menshikti tilshisi.
Sarapshynyń paıymynsha, Óńirlik ekologııalyq sammıt Samarqand klımattyq forýmy, sondaı-aq muzdyqtar men taýly ekojúıelerdi saqtaýǵa arnalǵan Dýshanbe men Bishkektegi konferentsııalardyń júıeli jalǵasy sanalady. Búginde Ortalyq Azııa elderi ekologııanyń nasharlaýynan bolatyn saldardy baqylaýmen shektelmeı, naqty úılestirilgen is-qımylǵa kiristi.
— Aımaq memleketteri ekologııalyq máselelerdi sheshý jaýapkershiligin óz moınyna alýǵa daıyn ekenin aıǵaqtap otyr. Ortalyq Azııa elderi buǵan deıin deklaratıvtik deńgeıde qalyp kelgen is-qımyldardy naqty júzege asyrýǵa beıil. Buǵan respýblıkalardyń «Ortalyq Azııanyń ekologııalyq yntymaqtastyǵy» deklaratsııasyn qabyldaý, BUU qurylymdarymen seriktestikte óńirlik yntymaqtastyqty júıeleýge degen umtylysy dálel, — dedi Akramjon Nematov.
Sarapshy atap ótkendeı, sammıt barysynda óńir memleketteri klımattyq syn-qaterlerdiń aýqymyna ǵana toqtalǵan joq, sonymen birge olardy eńserýge baǵyttalǵan josparlarymen bólisti. Máselen, prezıdentter jobalarǵa qarjylyq-tehnıkalyq járdemdesý tetikterin birizdendirý, ǵylymı bazany damytý, tehnologııalyq ilgerileýge asa nazar aýdardy.
— Ózara kelisilmegen bastamalardan oıysyp, birtutas óńirlik strategııa qalyptastyrýǵa kóshý — Ortalyq Azııanyń mańyzyn arttyrady. Shóleıttenýge qarsy kúres jónindegi óńirlik ortalyq qurý, qorshaǵan ortanyń biryńǵaı atlasyn ázirleý jáne ǵylymı-saraptamalyq bazany nyǵaıtýǵa baǵyttalǵan usynystar erekshe suranysqa ıe bola bastady. Ortaq derekter júıesin jasaqtaý ekologııalyq ózgeristi ótken jyldardyń málimetimen salystyra otyryp baqylaý júrgizýge múmkindik beredi. Osylaısha, Ortalyq Azııa óńirdegi klımattyq ózara yntymaqtastyqtyń turaqty modelin qalyptastyryp jatyr, — dep pikir bildirdi Strategııalyq jáne óńiraralyq zertteýler ınstıtýtynyń ókili.
Akramjon Nematov sammıtte kóterilgen bastamalardy dáıekti iske asyrý óńir elderiniń kúrdelenip bara jatqan klımattyq táýekelderge jedel beıimdelýine yqpal etedi. Tıisinshe, yqtımal qaýipterdiń aldyn alýǵa baǵyttalǵan sharalar legin aqyldasa qabyldaý múmkin bolady.
Eske salaıyq, Astanada ótken sammıt qorytyndysy boıynsha 4 mańyzdy qujatqa qol qoıyldy.
Sondaı-aq, BUU ókilderi Óńirlik ekologııalyq sammıttiń uıymdastyrylýyn oń baǵalady.
