Ó. Jánibekovtyń týǵanyna 80 jyl tolýyna baılanysty arnaıy tulǵataný sharalary uıymdastyrylsa ıgi - Q. Sultanov
ASTANA. 5 mamyr. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynyń senator Qýanysh Sultanov Úkimet basshysynyń atyna saýal joldady.
Onda depýtat qazaqtyń ardaqty birtýar azamaty Ózbekáli Jánibekovtyń týǵanyna 80 jyl tolýyna baılanysty mereıtoıdy óz deńgeıinde atap ótý máselesin kóterdi.
«Bıyl kórnekti memleket, qoǵam jáne mádenıet qaıratkeri, ǵalym etnograf, tarıhshy, ultymyzdyń uıytqysyna aınalǵan, qazaqtyń ardaqty birtýar azamaty Ózbekáli Jánibekovtyń týǵanyna 80 jyl tolady. Ózbekáli Jánibekovtyń kim ekendigin, onyń óz Otanyna, ultyna, halqyna, ásirese, ulttyq mádenıetimizge sińirgen qajyrly eńbegin Sizge aıtyp jatýdyń ózi artyq bolar. Biraq, búgingi qoǵamǵa, ásirese keleshek urpaqqa Ó.Jánibekovtyń ult taǵdyry úshin jasaǵan ıgilikti isterin, týǵan halqynyń keleshegine degen qamqorlyǵyn, Otanyna súıispenshiligin, azamattyq bolmysyn jastardyń sanasyna jetkizý, onyń tarıhı tulǵalyǵyn marapattaý qajet-aq. Bul máseleler BAQ-tarda kóterilip, ártúrli mádenıet qaıratkerleri pikirlerin aıtyp júr. Osy oraıda, Ó.Jánibekovtyń 80 jyldyq mereıtoıyn óz deńgeıinde ótkizý maqsatynda arnaıy tulǵataný sharalary uıymdastyrylsa ıgi», - dedi senator. Osy rette Q. Sultanov, atalǵan sharaǵa Úkimet tarapynan mán berilýi, Astana men týǵan jeri - Otyrarda arnaıy ǵylymı-tájirıbelik konferentsııa uıymdastyrylýy kerektigin de atap ótti. «Sonymen qatar Ó.Jánibekovtyń shyǵarmashylyq murasyn júıelep, jınaǵyn jaryqqa shyǵarý, ol týraly estelik kitap shyǵarý júzege asyrylsa ıgi bolar edi», - dedi ol.
