Ó. Shókeev Shymkentte «Beıneý-Bozoı-Shymkent» gaz qubyrynyń qurylysy boıynsha keńes ótkizedi
ASTANA. Qazannyń 28-i. QazAqparat /Marlan Jıembaı/ - Búgin selektorlyq formattaǵy Úkimet otyrysynda QR Premer-Mınıstri Kárim Másimov óziniń birinshi orynbasary Ómirzaq Shókeevke Shymkentte «Beıneý-Bozoı-Shymkent» gaz qubyrynyń qurylysy boıynsha keńes ótkizý jóninde tapsyrma berdi.
Májilis barysynda atalǵan qubyrdyń qurylysyna qatysty baıandama jasap jatqan Munaı jáne gaz vıtse-mınıstri Lázzat Qıynovty toqtatqan K.Másimov, bul derekterdi osydan eki aı buryn mınıstrdiń aıtqandyǵyn atap ótip, atqarylǵan naqty jumystardy baıandaýyn surady. Alaıda baıandamashynyń aıtqandaryna kóńili tolmaǵan ol: «Baıandama shyndyqty kórsete almady. Tipti men sizdiń baıandaǵanyńyzdan da kóp aqparat bilemin. Alaıda, siz qandaıda bir jańalyq aıtýyńyz kerek edi», - dedi.
Osydan keıin Úkimet basshysy Úkimet otyrysyna Shymkentten tikeleı beınebaılanysqa shyǵyp otyrǵan Ó.Shókeevke gaz qubyryna qatysty keńes ótkizýge tapsyrma berdi.
«Biz kelistik, barlyq máseleler sheshildi. Qarjy bólindi. Mınıstr ótingen máselelerdi biz sheshtik, oǵan qytaılyqtar kelisti. Endi qurylysty sozbaı bastaý kerek. Artynan ákimderdiń biri «qubyr meniń oblysym arqyly ótetinin bilmeppin dep júrmesin», - dedi K.Másimov.
