Ó. Shókeev Qazaqstannyń Aýyl sharýashylyǵy bankin qurýdy qoldaıdy
ASTANA. Maýsymnyń 21-i. QazAqparat /Ernur Aqanbaı / - Premer-Mınıstrdiń birinshi orynbasary Ómirzaq Shókeev Qazaqstanda aýylsharýashylyq taýarlaryn óndirýshilerge nesıe beretin Aýyl sharýashylyǵy bankin qurýdy qoldaıdy.
«Aýyl sharýashylyǵy bankin qurý máselesi kún tártibinde tur. Alaıda bul máselege qatysty Úkimet tarapynan, Ulttyq bank tarapynan ártúrli kózqarastar bar. Sondyqtan da bundaı bankti qurý máselesi qarastyrylyp jatyr, biraq naqty sheshim joq. Al meniń jeke kózqarasyma keletin bolsaq, men Aýyl sharýashylyǵy bankin qurý qajet dep sanaımyn», dedi Ó. Shókeev búgin Parlament palatalarynyń birlesken otyrysynda depýtattardyń suraǵyna jaýap bergen kezinde.
Ó. Shókeev qazir Úkimet Reseıdiń tájirıbesin, ıaǵnı Reseıdegi Aýyl sharýashylyǵy bankiniń qyzmetin muqııat baqylap otyrǵanyn atap kórsetti. Onyń aıtýynsha, Reseı Aýyl sharýashylyǵy banki aýylsharýashylyq taýarlaryn óndirýshilerdi aıtarlyqtaı tabysty nesıelep jatyr.
