Ó.Shókeev Aqtóbede TKSh salasyn qaıta jańǵyrtý baǵdarlamasyn júzege asyrý jóninde kóshpeli keńes ótkizedi
ASTANA. 19 qazan. QazAqparat - 20 qazan kúni Aqtóbede birinshi vıtse-premer Ómirzaq Shókeevtiń tóraǵalyǵymen 2011-2020 jyldarǵa arnalǵan Turǵyn úı kommýnaldyq sharýashylyǵyn qaıta jańǵyrtý baǵdarlamasyn júzege asyrý jónindegi kóshpeli keńes ótedi.
Keńeske qatysýshylar kóp páterli turǵyn úılerdegi jóndeý jumystarynyń nátıjesin talqyǵa salady.
TKSh qaıta jańǵyrtýdyń 2011-2020 jyldarǵa aralǵan baǵdarlamasynda jóndeý jumystaryn qarjylandyrýdyń eki tetigi bar, dep habarlady «Qazaqstannyń TKSh qaıta jańǵyrtý men damytý ortalyǵy» AQ-nyń baspaóz qyzmeti.
2011 jyldyń 17 qazanyndaǵy jaǵdaıǵa sáıkes birinshi tetik boıynsha (termomoderindeý elementterimen birge kúrdeli jóndeýden ótkizý) 14 aımaqta 73 úıdi jóndeýden ótkizý jumystary qolǵa alyndy.
2011 jyldyń 17 qazanyndaǵy jaǵdaıǵa sáıkes ekinshi tetik boıynsha (jóndeý jumystarynyń jekelegen túrleri) 15 óńirdegi 305 úıge jóndeý jumystary bastaldy. Bul bıyl jóndeýden ótedi dep josparanǵan úılerdiń 73 paıyzyn quraıdy.
Baǵdarlamanyń eki tetigi boıynsha Aqmola oblysynda (14 úı), Aqtóbe oblysynda (45 úı), Almaty oblysynda (20 úı), Atyraý oblysynda (12 úı), ShQO-da (48 úı), Jambyl oblysynda (18 úı), Batys Qazaqstan oblysynda (13 úı), Qaraǵandy oblysynda (36 úı), Qyzylorda oblysynda (12 úı), Mańǵystaý oblysynda (2 úı), Pavlodar oblysynda (9 úı), Soltústik Qazaqstan oblysynda (16 úı), Ońtústik Qazaqstan oblysynda (5 úı) jáne Astana (8 úı) men Almaty (47 úı) qalalarynda jóndeý jumystary júrgizilýde.
