O.Shıshıgına oqýshylar úshin Prezıdenttik test normatıvterin tómendetý kerek dep sanaıdy
ASTANA. QazAqparat - Dene shynyqtyrý daıarlyǵy boıynsha elimizdegi Prezıdenttik test normatıvteri tym joǵary bolyp otyr. Búgin Májilistiń Áleýmettik-mádenı damý komıtetiniń keńeıtilgen otyrysynda depýtat Olga Shıshıgına osylaı málim etti. Eske sala keteıik, Darıǵa Nazarbaevanyń jetekshiligimen ótken otyrysta elimizdegi buqaralyq sportty damytý máseleleri talqylanǵan bolatyn.
«Eń bastysy - bul Prezıdenttik normatıv testiler kórsetkishiniń joǵarylyǵy, osyǵan qatysty men Sport jáne dene shynyqtyrý isteri agenttiginiń aldynda birneshe márte másele kótergen edim. Olardyń usynyp otyrǵandary - shamadan tys joǵary normalar. Jalpy, bizge sportpen shuǵyldana bastaıtyn qalyń buqara kerek. Biz eń aldymen solardy dene shynyqtyrýǵa tartyp, árbir adam osy normatıvke jaqyndaı alatyndaı múmkindik qarastyrýymyz kerek. Túptep kelgende, bizge mektep oqýshylary úshin Prezıdenttik test normatıvterin tómendetý kerek. Sportta nátıjeniń sońyna túsip qýa bermeı, onyń buqaralyq sıpatyn arttyrǵan lázim», - deıdi O. Shıshıgına.
Bul rette depýtat Sport jáne dene shynyqtyrý isteri agenttiginiń bekitken normatıvteri shynaıy emestigin alǵa tartyp, sońǵy úsh jyldaǵy qazaqstandyq mektepterdiń sporttyq jetistikteriniń Prezıdenttik test normatıvterimen salystyrmaly statıstıkasyna nazar aýdardy. Máselen, onyń aıtýynsha, ulttyq deńgeıde 4-synyp oqýshylary 30 metr qashyqtyqty 5,4 sekýndta júgirip shyǵýy tıis. Al shyn máninde 4-synyptyń ul balalary úshin jaqsy nátıje 5,8, al qyz balalary úshin 6,3 sekýnd bolýy kerek edi.
«9-synyp oqýshysy Prezıdenttik test normatıvine sáıkes, 60 metrdi 8,2 sekýndta júgirip shyǵýy kerek bolsa, shynaıy kórsetkish - 15 sekýnd. Qyz balalar bul qashyqtyqty 15,3 sekýndta júgirip shyǵady, Prezıdenttik normatıv - 9,2 sekýnd bolyp tur», - deıdi O. Shıshıgına.
