O.Sáttibaev qytaı boksshysynan utyldy, alaıda onyń Olımpıada joldamasyn alýyna taǵy bir múmkindigi bar
ASTANA. QazAqparat - Búgin Qytaıda bokstan Azııa jáne Muhıt aımaǵy elderi boıynsha Olımpıada oıyndaryna joldama beriletin týrnırdiń jartylaı fınaldyq básekeleri ótip jatyr.
Osydan birer sát buryn 52 keli salmaqta boksshymyz Oljas Sáttibaev qytaılyq sportshy Jıangvan Hýmen jekpe-jekte utylyp qaldy.
Aıta keteıik, sheshýshi kezeńge shyqqan boksshylarǵa Olımpıada joldamasy beriledi. Alaıda Oljas Sáttibaev qyrǵyz boksshysy Azat Úsenalıev pen ózbek sportshysy Shahobıdın Zoırovtyń kezdesýinde jeńilgen bylǵary qolǵap sheberimen rıngke shyǵady. Osy jekpe-jekte jeńiske jetse onyń Olımpıada joldamasyn alýyna múmkindigi bar.
Eske sala ketsek, buǵan deıin 75 keli salmaqta rıngke shyqqan qazaqstandyq boksshy Darıǵa Shákimova koreıalyq bylǵary qolǵap sheberi Ýn Jangty utyp, fınalǵa shyqqan edi.
Al, erler arasynda 75 keli salmaqtaboksshy Jánibek Álimhanuly mońǵolııalyq bylǵary qolǵap sheberi Shınebaıar Narmandahty tehnıkalyq nokaýtpen jeńdi.
64 kelide Abylaıhan Júsipov qytaılyq boksshy Tsıanksýn Hýdy tize búktirgen bolatyn.
Ókinishke qaraı kúndizgi sessııada 56 kelide óner kórsetken Qaırat Erálıev úndistandyq Shıva Tapaǵa jol bergen edi. Alaıda áli de úmit bar. Ol erteń, 1 sáýir kúni Marıo Fernandes (Fılıppın) - Chatchaı Býtdı (Taıland) jekpe-jeginde jeńilgen boksshymen joldamaǵa talasady.
