O.Sábdenniń «Ekonomıka» atty 10 tomdyq tańdamaly eńbegi jaryq kórdi
ALMATY. Naýryzdyń 3-i. QazAqparat /Ádilet Musahaev/ - Búgin Almatyda QR UǴA akademıgi, e.ǵ.d., professor, QR BǴM ǴK Ekonomıka ınstıtýtynyń dırektory, Qazaqstan ǵalymdar odaǵynyń prezıdenti Orazaly Sábdenniń «Ekonomıka» atty 10 tomdyq tańdamaly eńbekteriniń tusaýkeser rásimi ótti,
dep habarlaıdy QazAqparat.
Ǵalymnyń aıtýynsha bul eńbekke Qazaqstannyń áleýmettik-ekonomıkalyq damýynyń máseleleri jónindegi tańdaýly jumystary engizilgen.
Shara barysynda elimizdiń damýynyń jańa sapasyn qamtamasyz etetin jáne daǵdarystan keıingi ekonomıkanyń ózekti máselelerin sheshetin monografııa men maqalalar toptastyrylǵan 10 tomdyq jan-jaqty talqylandy.
«Jalpy, qazirgi bizdiń bastan keshirip otyrǵan jaǵdaıymyz óte kúrdeli kezeń desek bolady. Bul kezeń búkil dúnıejúziniń ekonomıkalyq daǵdarystan keıingi jandaný, jańǵyrý kezeńi. Osyǵan baılanysty ǵylym, tehnıkamyz jedel damýynyń arqasynda ınnovatsııalyq úrdis dúnıege kelip jatyr, ekonomıka jańa pármen alýǵa tıisti. Osy tusta ekonomıka ǵylymynyń róli óte mańyzdy, sondyqtan teorııalyq qoldanbaly negizder, strategııalyq joba jasaýymyz kerek. Al búgingi Orazaly Sábdenniń 10 tomdyǵy osy strategııalyq joba men tuspa-tus kelip otyr», deıdi ekonomıka ǵylymdarynyń doktory, professor, QR UǴA akademıgi Amanjol Qoshanov.
