Nıýrnberg protsesiniń qujattary aýktsıon arqyly satylady
ASTANA. 23 qańtar. QazAqparat - Natsıstik qylmyskerler ústinen júrgizilgen Nıýrnberg protsesi kezinde prokýrorlar paıdalanǵan qujattar jınaǵy Izraılde ótetin aýktsıonda satylmaq, dep habarlaıdy Lenta.rý Associated Press-ke silteme jasap.
Satylymǵa qoıylar aldynda bul materıaldar Berlınniń Evreı bilim berý ortalyǵynda 27 qańtarǵa deıin kópshilik nazaryna usynylatyn bolady.
Úshinshi Reıh qujattarynyń aǵylshyn tiline aýdarylǵan nusqalaryn prokýrorlar sottalýshylarǵa, onyń ishinde German Gerıng men Rýdolf Gesske qarsy aıyp taǵý úshin paıdalanǵan.
Atalǵan qujattardyń arasynda natsıstik kóshbasshylardyń «evreı máselesin sheshýge» arnalǵan kezdesýiniń esebi de bar. Mundaı júzdesýlerde ádette Eýropany mekendeıtin evreı halqyn jappaı qyryp-joıýǵa qatysty josparlar talqyǵa salynatyn bolǵan.
Izraıldegi eski zattar satylatyn bazarlardyń birinen tabylǵan kóne qujattar 29 qańtar kúni satýǵa qoıylady.
