Nıýrnberg qalasynda Gıtlerdiń sýretteri qymbat baǵada satyldy
ASTANA. QazAqparat - Germanııanyń Nıýrnberg qalasynda «Auktionshaus Weidler» aýktsıon úıi ótkizgen bássaýdada Adolf Gıtlerdiń 1908-1922 jyldar aralyǵynda salǵan 14 akvareli satyldy, dep habarlady «VVS» agenttigi.
Sýretter 450 myń dollarǵa baǵalandy. Eń qymbatqa satylǵany Bavarııadaǵy Noıshvaınshtaın qamalynyń sýreti boldy. Ony Qytaıdan kelgen ınvestor 110 myń dollarǵa satyp aldy. Nıýrnberg aýktsıon úıi osymen birneshe ret Gıtlerdiń sýretterin satty. Natsıstik partııa qurǵanǵa deıin Gıtler sýretshi bolýdy armandaǵan. Germanııada natsızmdi nasıhattaýǵa zańmen tyıym salynǵan. Alaıda, Gıtlerdiń sýretterin satýǵa rýqsat bar. Sebebi, onyń sýretterinde natsıstik ıdeologııany nasıhattaıtyn belgiler joq.
