Nıý-Iorktiń birinshi musylman meri ant qabyldaýda quran qoldandy

ASTANA. KAZINFORM — Nıý-Iorktiń birinshi musylman meri Zohran Mamdanı ant qabyldaýda XVIII ǵasyrdaǵy Sırııadan shyqqan, Osman ımperııasy dáýirine jatatyn qoljazba qurandy paıdalandy, dep habarlaıdy Anadoly.

Mamdanı X áleýmettik jelisindegi paraqshasynda ant qabyldaý barysynda paıdalanylǵan Quran týraly aıtty. Ant qabyldaý rásimi 1 qańtarda ótken bolatyn.

Merdiń sózinshe, bul Quran XVIII ǵasyrdan bergi qoljazba sanalady, buryn Artýro Shombýrgke tıesili bolǵan. Ol Sırııadan shyqqan Osman dáýirindegi qoljazba ekenin atap ótti. Mátin qara sııamen jazylǵan, al keıbir bólikteri qyzyl túspen erekshelengen.

Mer bul Qurandy Nıý-Iork tarıhyndaǵy «jańa kezeńniń» sımvoly dep sıpattap, ony qalanyń barlyq turǵynyna ortaq qazyna dep sanaıtynyn aıtty. Quran Nıý-Iorktyń Bas qoǵamdyq kitaphanasynda kórmege qoıylady.

Aıta keteıik, 34 jastaǵy Zohran Mamdanı Ýgandada dúnıege kelgen. Ol 4 qarashada ótken saılaýda jeńiske jetip, sońǵy júz jylda Nıý-Iorktiń eń jas meri ári birinshi musylman meri atandy. CBS News derekterine sáıkes, saılaýǵa 2 mıllıonnan astam adam qatysty, bul - 1969 jyldan beri eń joǵary kórsetkish.

Budan buryn AQSh prezıdenti Donald Tramp Nıý-Iork qalasynyń meri Zohran Mamdanımen kezdeskenin jazǵan edik. Shara barysynda Tramp Mamdanıge Nıý-Iorkti qaýipsiz etý úshin birge jumys isteıtinine ýáde berdi.