Nıý-Iorktegi sot ǵımaraty aldynda ózin órtegen er adam qaıtys boldy

ASTANA. KAZINFORM – AQSh-tyń burynǵy prezıdenti Donald Tramptyń soty ótip jatqan Manhettendegi sot ǵımaratynyń aldyndaǵy shaǵyn saıabaqta ústine quıǵan suıyqtyqty jaǵyp, ózin órtep jibergen Maksvell Azzarello aýrýhanada kóz jumdy, dep habarlaıdy VVS. 

NBC jáne CNN habarlaýynsha, er adam aýyr jaǵdaıda aýrýhanaǵa jetkizilip, kóp uzamaı qaıtys boldy. Ol ózin órtep jiberer aldynda ol aınalasyna konspırologııalyq mazmundaǵy úndeý qaǵazdaryn shashqan. 

Nıý-Iork polıtsııasynyń basshylary keıin qysqasha baspasóz máslıhatyn ótkizip, onyń esimi Maksvell Azzarello ekenin habarlady. Er adam 1987 jyly týǵan, Florıda shtatyndaǵy Sent-Ogastın qalasynda turǵan. Ol Nıý-Iorkke shamamen 13 sáýirden keıin kelgen, otbasy bul týraly bilmegen. Ol jaǵyp jibergen janǵysh suıyqtyq alkogol negizindegi tazartqysh boldy. 
Resmı tulǵalardyń aıtýynsha, ol qandaı da bir adamǵa nemese adamdar tobyna shabýyl jasamaq bolǵany ekitalaı. Olardyń pikirinshe, Azarellony bul áreketke onyń konspırologııalyq kózqarasy ıtermelegen.

Bul tujyrymǵa onyń áleýmettik jelidegi jazbalary men ózin órtep jiberer aldynda shashyp jibergen qaǵazdar mazmuny negiz bolǵan. 

Polıtsııa qyzmetkerleri órt týraly habardan keıin eki mınýttan keıin áreket etti. 

Sondaı-aq baspasóz máslıhaty kezinde polıtsııanyń joǵary laýazymdy sheneýnikteri qaýipsizdik josparyn qaıta qaraıtyndaryn aıtty, biraq olar óz kózqarastaryna senimdi bolyp, qajet bolǵan jaǵdaıda ózgerister engizetinin málimdedi. 

Buǵan deıin habarlanǵandaı, AQSh-tyń burynǵy prezıdenti Donald Tramptyń soty ótip jatqan Manhettendegi sot ǵımaratynyń aldyndaǵy shaǵyn saıabaqta jas jigit ózine suıyqtyq jaǵyp, órtep jibergen.