Nıý-Iorktegi serýen: qala prezıdent saılaýyna qalaı daıyndalyp jatyr
ASTANA. KAZINFORM - Birer kúnnen keıin – 5 qarashada AQSh jurty prezıdent saılaıdy. Amırıka basshysy bolýǵa eki úmitker – Respýblıkalyq partııadan Donald Trapm jáne demokrattardyń atynan Kamala Harrıs talasyp jatyr. Kazinform agenttiginiń menshikti tilshisi Nıý-Iorkte serýendep, qalanyń saılaý aldyndaǵy daıyndyǵyna sholý jasady.
Meniń baǵdarym Tómengi Manhettennen – Betterı park (Battery park) bastaldy. Brodveımen (Nıý-Iorktegi eń uzyn kóshe – red. esk.) jalǵasyp, Time Square (Taım Skver) arqyly Trump Tower (Tramp Taýer) deıin sozyldy. Gýgl karta bul baǵdardy 2 saǵat 4 mınýtta ótýge bolady dep kórsetti, biraq men saılaýǵa qatysty «mańyzdy habarlamany» jiberip almaıyn dep asyqpaı – 3 saǵat 2 mınýt júrdim. Kóshede, ǵımarattarda úmitkerlerdiń úgit-nasıhat baǵytyndaǵy qandaı da bir banner nemese habarlamalaryn baıqamadym. Tańǵaldym. Múmkin kásipkerler «aqsha berseń de saıasatqa aralaspaımyn» degen pikirdi bildirgen shyǵar. Kim bilsin?!
Jol boıy Chaına taýnǵa da soqtym. Kóshedegi satýshy jáne mýzykanttarmen áńgimelestim. Men olardan «Saılaýǵa barasyzdar ma?» dep suraǵanymda jyly jymıyp qoıa berdi.
Al, Nıý-Iorktiń keıbir turǵyny tańdaýyn ashyq bildirip, Donald Tramptyń «Make America Great Again» (Amerıkany qaıta myqty etemiz) degen urany jazylǵan bas kıim jáne jeıdelerdi kıip alǵan. Burynǵy prezıdenttiń jaqtaýshylaryn metrodan jıi kórdim.
Tramp munarasyna deıin shý, qaptaǵan týrıster jáne amerıkalyq megapolıstiń nyshanyna – sary taksıler shyǵaryp saldy. Osy oraıda aıta ketý kerek, Nıý-Iorkte mıgranttar kóp jáne olar «saılaýǵa qatty alańdamaıdy».
Aıtqandaı, qalanyń bas kitaphanasynda daýys berýge shaqyratyn alyp bannerdi de sýretke túsirip aldym.
Sóıtip Taım skverge de jettim. Jarqyldaǵan úlken ekrandarda prezıdent bolýǵa úmitkerlerdi — Kamala Harrıs pen Donald Trampty kórdim.
Áıgili alańda jýrnalıster stendap túsirip, saılaýǵa sıýjetterin daıyndap jatty. Ári qaraı men baǵdarymnyń sońǵy núktesine – Tramp munarasyna keldim. Trump Tower ǵımaratyna qarama-qarsy plakat ustaǵan adamdar tur eken.
Munaraǵa qarsy betti amerıkalyqtar Trampqa qatysty keri pikirin bildirip jatsa, onyń aldynda jáne ishinde jaǵdaı múldem basqa boldy.
Myna Santa Klaýs qonaqtardy kóńildi qarsy alyp, hat jazýyn ótinip tur. Kez kelgen tilekti oryndaýǵa ázir ekenin de jetkizdi.
Al, Tramp taýerdiń ishinde «AQSh-tyń 45-shi prezıdenti» degen jazýdyń qasynda estelikke sýretke túsken úmitkerdiń jaqtaýshylaryn kórdim. Al, keıbir amerıkalyqtar mıllıarderdiń dúkeninde saýda jasaıdy.
Nıý-Iork kóshelerine saıahatymdy qorytyndylasam, saılaýǵa shaqyratyn úgitteýi jazbalardy kóp kórmeginimdi aıtqym keledi. Biraq bul amerıkalyqtar saılaýdy talqylamaıdy degendi bildirmeıdi. Aıtpaqshy, Nıý-Iork Saılaý komıssııasy resmı saıtynda turǵyndardy aldyn ala daýys berýge shaqyrdy. Aldyn ala daýys berý 26 qazanda bastaldy jáne 3 qarashaǵa deıin bolady.
Saılaýdyń aldyn ala boljamyna súıensek, eki úmitkerge berilgen daýystyń arasyndaǵy alshaqtyq alys emes. Demek AQSh prezıdenti bolýǵa talas saılaý bolatyn kúni qyza túsetini anyq.
AQSh-taǵy alda bolatyn prezıdent saılaýyna qazirdiń ózinde 51 mln-nan astam saılaýshy daýys berip úlgergeni týraly jazdyq.
