Nıý-Iorktegi ortalyq saıabaqtan da kóp: Almatyda bir aıda 30 myń aǵash otyrǵyzyldy
ALMATY. KAZINFORM – «Almaty – bizdiń ortaq úıimiz» naýqany bastalǵaly beri megapolıste 30 myńnan astam japyraqty aǵash jáne 5 myń buta otyrǵyzyldy.
Almaty ákimdigi atap ótkendeı, bul Nıý-Iorktiń áıgili ortalyq saıabaǵyndaǵy aǵashtan da kóp. Onda 18 - 25 myń túp aǵash bar. Kóbinese álemde japyraqty aǵashtardan turatyn úlken saıabaqtar «qalanyń ókpesi» sanalady.
Almaty ákimi Erbolat Dosaevtyń bastamasymen aǵashtardy jappaı otyrǵyzý 27 sáýirde ótti. Aktsııa barysynda qalanyń 8 aýdanynda barlyǵy 8 205 jasyl jelek, onyń ishinde 4 myńnan astam alma aǵashy otyrǵyzyldy.
Sonymen qatar «Jasyl aýla» aktsııasy aıasynda qala turǵyndaryna 3 myń kóshet, «Almaty – baq qala» jalpyqalalyq aktsııasy barysynda 8 myńnan astam kóshet taratyldy.
Bıyl 19 sáýirde barlyq jalpy bilim beretin mektepterde «Mektep aýlasynyń oazısi» landshafty dızaın festıvali ótti. Festıval aıasynda 5-11 synyp oqýshylary 20 myńnan astam gúl, 430 jemis aǵashy jáne 200 týıa kóshetin otyrǵyzdy.
Esterińizge sala keteıik, Memleket basshysynyń tapsyrmasymen eldi meken aýmaǵyn abattandyrý jáne kógaldandyrý týraly «Taza Qazaqstan» aktsııasy aıasynda Almaty qalasy ákimdigi 2024 jylǵy 8 sáýir men 8 mamyr aralyǵynda «Almaty – bizdiń ortaq úıimiz» naýqanyn ótkizdi.
Naýqannyń negizgi maqsaty – qala ınfraqurylymyna uqypty qaraý qundylyǵyn qalyptastyrý, halyqty joǵary azamattyq jaýapkershilik pen ekologııalyq mádenıetke tárbıeleý.
