Nıý-Iorktegi áıgili záýlim ǵımaratqa órmelegen jup sot aldynda jaýap beretin boldy
ASTANA. KAZINFORM — Nıý-Iorktegi Empire State Building záýlim ǵımaratyna órmelegen reseılik jup qylmystyq jaýapkershilikke tartyldy, dep habarlaıdy NBC News.
Manhetten aýdandyq prokýratýrasy bergen qylmystyq shaǵymǵa sáıkes, 33 jastaǵy Anjelına Nıkolaý men 32 jastaǵy Ivan Kýznetsovqa qoǵamdyq qaýipsizdikke qaýip tóndirý, múlikke ekinshi dárejeli qylmystyq zııan keltirý jáne shamamen 450 metrlik ǵımaratqa órmeleý isi boıynsha aıyp taǵyldy.
Qara kostıým men maska kıgen jup ǵımaratqa órmelep, artynsha antennaǵa «Mahabbat kúshi bılikke degen qushtarlyqty jeńgende, álemde tynyshtyq ornaıdy» degen jazýy bar jalaý ildi.
Ekeýi de kinásin moıyndamady. Olardyń isi kepildikpen bosatýǵa múmkindik bermeıdi, sondyqtan olar sotqa deıin qamaýda emes, baqylaýda bolady.
Olardyń advokaty Djeıson Krınskıı klıentteriniń basqalarǵa eshqandaı qaýip tóndirmegenin aıtyp, olar ǵımaratqa órmelegende jeldiń jyldamdyǵy «óte tómen» bolǵanyn atap ótti. Ol sondaı-aq ekeýiniń Empire State Building-tiń baqylaý alańynyń jalǵa alýshylaryna, kelýshilerine nemese qonaqtaryna eshqandaı qaýip tónbeıdi» degen málimdemesine silteme jasady.
Shaǵymda aıtylǵandaı, Empire State Building ǵımaratynyń qaýipsizdik qyzmeti shamamen saǵat 11:15-te polıtsııaǵa ǵımarat shatyryndaǵy antenna aýmaǵynda qaýipsizdik talaptarynyń buzylýy múmkin ekeni týraly habar bergen. Antennaǵa jetý úshin birneshe shekteýli aımaqtan ótý qajet bolǵan. Atap aıtqanda, 103-qabatqa tek 102-qabattaǵy kúzetiletin esik arqyly ótetin arnaıy ruqsat kartasy bar adamdar ǵana kire alady.
Shaǵymda aıtylǵandaı, polıtsııa habar taratý antennasy ornalasqan 104-qabatqa aparatyn esiktiń qulpy buzylǵanyn anyqtaǵan. Sonyń saldarynan shamamen 2 myń dollar kóleminde materıaldyq shyǵyn kelgen.
Sondaı-aq qujatta antennanyń adam aǵzasyna zııan keltirýi múmkin joǵary jıilikti radıosıgnaldar shyǵaratyny aıtylǵan. Osyǵan baılanysty Nıý-Iork polıtsııasynyń jedel qyzmeti oqıǵa ornyna jetkenge deıin bılik ókilderi antennany ýaqytsha óshirýge májbúr bolǵan. Bul protsess shamamen 30 mınýtqa sozylǵan.
Polıtsııanyń málimetinshe, Nıkolaý men Kýznetsov habar taratý antennasynyń ústinde nemese onyń mańynda qalyp qoıǵan. Olardy ol jerden túsirý ońaı bolmaǵan. Osylaısha olar polıtsııa qyzmetkerleriniń ómirine eleýli qaýip tóndirgen. Bul týraly qylmystyq shaǵymda aıtylǵan.
Buǵan deıin Anjela Nıkolaý men Ivan Kýznetsov 2022 jyly birneshe aı Almatyda turǵan. Osy qalada olar fotograf Aleksandr Kýznetsovpen birge «Nurly Taý» turǵyn úı kesheniniń shatyrynda túsirilgen panoramalyq vıdeosymen keńinen tanylǵan bolatyn. Olardyń aıtýynsha, bul záýlim ǵımarat erekshe sáýleti men Іle Alataýyna ashylatyn áserli kórinisi úshin tańdalǵan.
Osyǵan deıin Aıdana Tursyn esimdi «órmekshi qyz» týraly jazǵanbyz. Ol ekinshi qabatqa eshqandaı qurylǵyny paıdalanbaı-aq erkin shyǵa alady.
