Nıý-Iorkte toqpen júretin áýe taksıi tanystyryldy
ASTANA. KAZINFORM — Jańa kólik jaqyn arada Manhetten men Djon Kennedı atyndaǵy halyqaralyq áýejaı arasynda qatynaıtyn jolaýshylardyń ýaqytyn únemdemek. Ol keptelisten aınalyp ótedi, dep habarlaıdy Kazinform agenttiginiń Vashıngtondaǵy menshikti tilshisi.
Nıý-Iork qalasyndaǵy elektrli áýe taksıi áýejaıǵa deıingi eki saǵattyq joldy endi shamamen 7 mınýtta ushyp ótedi. Oǵan bir mezette 4 jolaýshy mine alady.
eVTOL («elektrli tik ushyp kóterilý jáne qoný» degen sózdiń qysqarǵany) dep atalatyn ushaq benzın nemese avıakerosınniń ornyna batareıamen jumys isteıdi. Ol tikushaq sııaqty ushyp-qonyp, ushaq sııaqty usha alady. Áýe kóligin Kalıfornııadaǵy Joby Aviation kompanııasy jasaǵan.
Jańa áýe kóligi ádettegi tikushaqqa qaraǵanda qoljetimdi ári yńǵaıly, óıtkeni tikushaqty basqarý úshin jıi iri ári kúrdeli qorǵanys jabdyqtary qajet bolady.
Kompanııanyń baǵalaýynsha, Manhetten men Djon Kennedı atyndaǵy áýejaı arasyndaǵy sapar shamamen 200 dollar turýy múmkin, bul Uber Black tarıfimen shamalas.
Qazirgi ýaqytta jańa apparat Blade tikushaqtary qyzmet kórsetetin baǵyttarda ushýy josparlanǵan. Olardyń qataryna Manhettendegi tikushaq alańdary men Nıýark, Vestchester okrýgi jáne Hemptons sııaqty aımaqtarǵa reıster kiredi.
Kommertsııalyq iske qosylar aldynda áýe apparaty AQSh-tyń Federaldyq azamattyq avıatsııa basqarmasynan sertıfıkat alýy tıis.
Sheneýnikterdiń aıtýynsha, ruqsat jaqyn arada berilýi múmkin, bul elektrli áýe taksıdiń Nıý-Iork kólik júıesiniń turaqty bóligine aınalýyn jyldamdatýy yqtımal.
Eske salaıyq, byltyr qazan aıynda qytaılyq kompanııa avtonomdy ushatyn taksıdi iske qosty.
