Nıý-Iorkte tikushaq apatynan alty adam qaza tapty

ASTANA. KAZINFORM – Nıý-Iork qalasynyń kórikti jerlerin aralaý kezinde tikushaq Gýdzon ózenine qulap, bir otbasy men ushqysh qaza tapty, dep habarlaıdy The New York Times.

Qutqarýshy brıgadalar Nıý-Djersı shtatynyń Djersı-Sıtı qalasy mańynda apatqa ushyraǵan tikushaqtyń bólikterin kóterip jatyr.

Qaza bolǵan jolaýshylar Siemens kompanııasy ıspandyq fılıalynyń prezıdenti Agýstın Eskobar men onyń áıeli, úsh balasy ekeni belgili boldy. 

Tikushaqty týrısterge birneshe júz dollarǵa nebári 15 mınýtta qalanyń kórikti jerlerin – Ortalyq saıabaq, Bostandyq músinin joǵarydan kórýge usynatan New York Helicopter jergilikti týrıstik kompanııa bergen. 

Djersı-sıtıdiń tótenshe jaǵdaılar jónindegi basqarmasy apatqa qatysty tergeý amaldaryn bastady. 

Kýágerlerdiń aıtýynsha, qatty gúrsilden keıin olar aspannan qulaǵan tikushaqty kórgen. Joǵarydan birneshe synyq qulap, qaıyqtardaǵy adamdardyń úreıin týdyrdy. 

Prezıdent Donald Tramp Truth Social-da tikushaq apaty qurbandarynyń týystary men jaqyndaryna kóńil aıtty.

Ol kólik mınıstri Shon Daffı men onyń qyzmetkerleri tergeý júrgizip jatqanyn jáne jaqyn arada óz qorytyndylaryn jarııalaıtynyn atap ótti.

Bul sońǵy eki onjyldyqta týrızm salasyndaǵy adam ólimine ákelgen úshinshi tikushaq apat boldy.

2009 jyly ıtalıalyq týrıster mingen tikushaq Gýdzon ózeniniń ústinde jekemenshik ushaqpen soqtyǵysyp, saldarynan toǵyz adam qaza tapqan.

2018 jyly esikteri ashyq turǵan tikushaq Ist-Rıver buǵazyna qulap, aýdarylyp qaldy. Bes jolaýshy sýǵa batyp ketti, tek ushqysh aman qaldy.

Buǵan deıin Vashıngtonda ózennen áskerı tikushaq qaldyqtary tabylǵanyn jazǵan bolatynbyz.