Nıý-Iorkte ótken dóńgelek ústel amerıkalyq bıznes ókilderiniń qyzyǵýshylyǵyn týdyrdy
ASTANA. KAZINFORM — Nıý-Iorkte prezıdent Qasym-Jomart Toqaevpen ótken dóńgelek ústel amerıkalyq bıznes ókilderiniń qyzyǵýshylyǵyn týdyrdy, dep habarlaıdy Kazinform menshikti tilshisi.
Sheteldikter Qazaqstan prezıdentiniń ekonomıkanyń túrli salalaryndaǵy basymdyqtaryna jáne eldiń ózara tıimdi yntymaqtastyqqa ashyqtyǵyna úlken qyzyǵýshylyq tanytty.
— Meniń oıymsha, bul keremet dóńgelek ústel boldy. Tanystyrylǵan kompanııalar men ondaǵy adamdar — álemdegi eń úzdik. Prezıdenttiń basymdyqtary týraly tyńdaý óte qyzyqty boldy. Biz eldiń taý-ken óndirý jáne óńdeý salasyndaǵy tájirıbesin damytýǵa kómektesetinimizge úmittenemiz jáne jobany osy baǵytta jalǵastyrýdy asyǵa kútemiz. Bul men úshin barlyǵynyń Qazaqstan damýynyń bir bóligi bolǵysy keletinin kórsetetin kúshti sıgnal boldy dep oılaımyn, — dedi Kolorado taý-ken isi mektebiniń prezıdenti Pol Djonson.
Jasandy ıntellekt tehnologııalarynyń jetekshi provaıderi Cohere kompanııasynyń bas dırektory Martın Kon Prezıdenttiń Qazaqstandy JI salasyndaǵy kóshbasshyǵa aınaldyrý umtylysyn joǵary baǵalady.
— Osynda shaqyrtý alý men úshin úlken mártebe boldy. Pikirtalas óte jyly jáne ekonomıkanyń kóptegen salasy men sektorlaryn qamtyǵan yntymaqtastyqta ótti.
Biz Qazaqstannyń mınıstrlikterimen jáne keıbir jetekshi kásiporyndarymen ozyq jahandyq tehnologııalarymyzdy qalaı birlesip jumys isteýge jáne engizýge, sondaı-aq olardy qazaqstandyq naryqqa, tilge, mádenıetke jáne tarıhı aqparatqa beıimdeýge bolatynyn talqylap jatyrmyz.
Qazaqstannyń áriptestik úshin ashyqtyǵy maǵan qatty áser etti, sondyqtan Qurama Shtattardaǵy ınvestorlar men bıznesmender ózara tıimdi seriktestik qatynastar izdeıdi, jahandyq múmkindikterdi lokalızatsııalaý jáne olardy Qazaqstanǵa tán etý arqyly paıdalanýǵa umtylyp otyr, — dep bólisti pikirimen Cohere prezıdenti Martın Kon.
Aıta keteıik, keshe Prezıdent Qasym-Jomart Toqaevtyń Nıý-Iorkke jumys sapary bastaldy.
Memleket basshysy BUU Bas Assambleıasynyń mereıtoılyq 80-shi sessııasy aıasyndaǵy Jalpy debatta sóz sóıleıdi.
Keshe Prezıdenttiń Nıý-Iork qalasyndaǵy jumys sapary kanadalyq transulttyq kompanııanyń basshysymen kezdesýden bastaý aldy.
Toqaev AQSh-ta qazaq mádenıetin dáriptep júrgen Smıtson ınstıtýtyna alǵys aıtty.
Búgin Memleket basshysy AQSh Saýda mınıstrimen kezdesti. Sonymen qatar Qasym-Jomart Toqaev Donald Tramppen sóılesti.
AQSh prezıdenti Donald Tramp Qazaqstannyń Memleket basshysyn tarıhı kelisimmen quttyqtady.