Nıý-Iorkte ótken alǵashqy sot májilisinde Madýro men onyń áıeli ózderine taǵylǵan kináni moıyndamady
ASTANA. KAZINFORM – Venesýelanyń ornynan alynǵan kóshbasshysy Nıkolas Madýro men onyń áıeli Sılıa Flores Nıý-Iorktegi alǵashqy sot májilisinde ózderine taǵylǵan kináni moıyndaǵan joq, dep habarlaıdy Kazinform menshikti tilshisi NBC News- ge silteme jasap.
Májilis bastalǵan soń birneshe mınýt ótkende sýdıa Elvın Hellerstaın Nıkolas Madýroǵa ózin tanystyrýdy surady.
- Men Venesýelanyń prezıdentimin, meni ózimniń Karakastaǵy úıimnen ustap áketti, - dedi Nıkolas Madýro sotta ıspan tilinde.
Hellerstaın Madýroǵa tegin advokat jaldaýǵa quqyǵy bar ekenin jetkizgen jáne ol qandaı da bir keri sebep týyndamasa sot zalynan bosatylýy múmkin ekenin aıtty.
Madýro óziniń kinásiniń joq ekenin jáne áli de bolsa Venesýela prezıdenti ekenin aıtty. Sondaı-aq onyń áıeli Flores te kinásiz ekenin jetkizdi.
Sýdıa Hellerstaın Madýro men onyń áıeline olardyń quqyqtaryn túsindirdi jáne Nıý-Iorkte federalyq aıyptaý boıynsha qamaý kezinde konsýldyq qyzmetkerlerimen kezdese alatynyn jetkizdi. Maýdro bul quqyqty paıdalanǵysy keletinin aıtty.
AQSh zańdary boıynsha shetel azamattary jaqyn aradaǵy konsýldyqqa habar berýi kerek.
Maýdronyń advokaty Barrı Pollak ózi qorǵap jatqan azamattyń ázirge kepildikpen bosatylý týraly ótinish bermegenin, alaıda aldaǵy ýaqytta berýi múmkin ekenin aıtty.
Al Florestiń advokaty óziniń qorǵaýyndaǵy áıeldiń qabyrǵasyna zaqym kelgenin jáne tıisti emdeýdi qajet etetinin aıtty. Ázirge ol qamaýda otyr.
Erli-zaıyptyǵa esirtki terrorızmi men kokaın tasymaly jáne zańsyz qarý-jaraq saýdasymen baılanysty aıyp taǵyldy.
CBS News habarlaýynsha, Nıkolas Madýro men onyń áıeli Sılııa Flores kúsheıtilgen kúzetpen Brýklındegi ortalyq qamaý mekemesinen tikushaq arqyly Manhettendegi tikushaq alańyna jetkizilgen. Odan keıin olar sot otyrysy bastalmaı turyp birneshe saǵat buryn arnaıy kortejben sot ǵımaratyna aparylǵan.
Sot qujattaryna sáıkes, Madýrony tájirıbeli advokat Barrı Pollak qorǵaıdy. Ol buǵan deıin WikiLeaks negizin qalaýshy Djýlıan Assanjdyń múddesin qorǵaǵan. Barrı Pollak Harris St. Laurent & Wechsler LLP zań fırmasynda qyzmet etedi.
Al Sılııa Florestiń múddesin Hıýston qalasynan kelgen advokat Mark Donnellı qorǵaıdy. Ol Tehastaǵy «Parker Sanchez and Donnelly» zań fırmasynda jumys isteıdi. Donnellıdiń ómirbaıanynda AQSh Ádilet mınıstrliginde 12 jyl qyzmet etkeni, onyń ishinde Tehastyń Ońtústik okrýgi prokýrorynyń aǵa keńesshisi ári alaıaqtyqqa qarsy bólimniń basshysy bolǵany kórsetilgen.
Sot protsesi Nıý-Iorktegi Denıel Patrık Moınıhan atyndaǵy federaldy sot ǵımaratynda ótip jatyr.
Sýdıa Elvın Hellerstaınnyń málimdeýinshe, is boıynsha kelesi sot otyrysy 17 naýryz kúni saǵat 11:00-de ótedi.
CBS News dereginshe, Manhettendegi sot ǵımaraty mańynda qaýipsizdik sharalary aıtarlyqtaı kúsheıtilgen. Bul aýmaqta AQSh áskeriniń Madýrony tutqyndaýyna baılanysty kishigirim mıtıngiler ótip jatyr. Jınalǵandar arasynda daýly másele boıynsha ári qoldaýshylar, ári qarsy pikirdegi toptar bar.
Tómengi Manhettende shamamen 50 adam jınalǵan. Madýronyń jaqtastary «Prezıdent Nıkolas Madýro men Sılııa Floresti dereý bosatyńdar!» jáne «AQSh, Venesýeladan qolyńdy tart!» degen urandar kótergen.
Buǵan deıin AQSh Venesýelada júrgizilgen áskerı operatsııa barysynda prezıdent Nıkolas Madýrony qolǵa túsirgeni habarlanǵan edi.