Nıý-Iorkte qazaqstandyq belgili sýretshi-dızaıner Aıa Shalqardyń kórmesi ashyldy
ASTANA. KAZINFORM - Nıý-Iorktegi Sapar Contemporary galereıasynda «Beneath the Earth and Above the Clouds» atty kórme ashyldy. Bul kórmede qazaqstandyq jas talant Aıa Shalqar men qyrǵyz eliniń tanymal sýretshisi Altynaı Osmonyń biregeı týyndylary qoıylǵan.
Aıa Shalqar buǵan deıin Avstrııa astanasy Venada jáne AQSh-ta eki ret jeke kórmesin ótkizgen.
Al kórshiles eki el sýretshileriniń birlesken kórmesi Nıý-Iorkte alǵash ret uıymdastyrylyp otyr.
- Altynaı ekeýimizdiń shyǵarmashylyǵymyzda uqsastyq bar, ıdeıalarymyz toǵysady. Ekeýimizdiń de týyndylarymyz Orta Azııanyń tarıhyna, mádenı murasyna, jaýynger áıelder taqyrybyna negizdelgen, - deıdi Aıa Shalqar.
Ózindik qoltańbasy men tyń ıdeıalarymen erekshelenetin qos sýretshiniń art-týyndylary músin óneri, fotomontaj, dástúrli qolóner jáne «mıftik arheologııa» elementterin sheber biriktiredi.
Qazaqstandyq sýretshiniń bul kórmege usynǵan MERGEN jobasy — áıel-kentavrdyń jerleý orny retinde usynylǵan mıftik, boljamdy arheologııalyq ınstallıatsııa. Týyndy Tarbaǵataı eteginen tabylyp, bizdiń zamanymyzdyń VI ǵasyryna tıesili-mys degen ıdeıaǵa negizdelgen.
Kórmege kelgen Nıý-Iork turǵyny Ketı Krimer óz áserimen bylaı bólisti:
- Meniń oıymsha, mundaǵy adamdardyń kópshiligi Qazaqstan týraly, qazaq mádenıeti týraly asa kóp bilmeıdi nemese múlde oılanyp kórmegen de shyǵar. Olar, bálkim, qazaq sýretshisiniń ónerinen ne kútý kerektigin de elestete almaıtyn bolar. Sondyqtan Nıý-Iorkke kelip, óz boıyndaǵy kúsh-qýatyn, júregin, qııalyn birge ala kelgen osyndaı ór, aıqyn kózqarasty qazaq qyzyn kórý, - úlken oqıǵa.
Onyń árbir týyndysy óziniń mádenıeti men túp-tamyryna tereń baılanysty. Bul — rasynda da erekshe nárse.
Jáne menińshe, Nıý-Iork ol týraly áli talaı estıtin bolady.
Bul kórme — Ortalyq Azııanyń zamanaýı ónerin halyqaralyq deńgeıde tanytýda mańyzdy qadam. Kórme 3 sáýirden 15 mamyrǵa deıin ashyq.
Osyǵan deıin qaraǵandylyq sýretshi Káripbek Kúıikovtiń kartınalary Nıý-Iork kórermenderin tánti etkeni týraly jazdyq.