Nıý-Iorkte BUU Bas Assambleıasynyń 79-shy sessııasy ashylady

ASTANA. KAZINFORM – 10 qyrkúıek kúni Nıý-Iorkte Birikken Ulttar Uıymy Bas Assambleıasynyń 79-shy sessııasy ashylady. Bul týraly BUU baspasóz qyzmeti habar taratty.

Sessııanyń negizgi taqyryby — «Beıbitshilik, ornyqty damý jáne adamı qadir-qasıet jolyndaǵy birlik pen ártúrlilik barlyq jerde jáne barlyǵy úshin birdeı».

Bas Assambleıanyń 79-sessııasynyń tóraǵasy bolyp Kamerýnnyń burynǵy premer-mınıstri Fılemon ıAng saılandy. Saılaý BUU-nyń Nıý-Iorktegi shtab-páterinde 2024 jyldyń 6 maýsymynda ótti.

Kún tártibine sáıkes, sessııany Bas Assambleıa tóraǵasy ashqannan keıin bir mınýt únsizdik jarııalanady.

Sodan keıin sessııa jumysy Bas Assambleıa tóraǵasynyń orynbasarlary men laýazymdy tulǵalardy bas komıtetterge saılaý jónindegi uıymdastyrý máselelerine baǵyttalatyn bolady.

Sondaı-aq kún tártibin bekitý jáne jalpy jaryssózder ótkizý josparlanǵan.

Sessııa barysynda birqatar taqyryptar boıynsha jumys júrgiziledi: turaqty ekonomıkalyq ósim men turaqty damýǵa járdemdesý, halyqaralyq beıbitshilik pen qaýipsizdikti qoldaý, Afrıkanyń damýy, adam quqyqtaryn ilgeriletý, gýmanıtarlyq kómek kórsetý boıynsha kúsh-jigerdi tıimdi úılestirý, ádilettilikti jáne halyqaralyq quqyq normalaryn saqtaýdy yntalandyrý, qarýsyzdaný, esirtkige baqylaý, qylmystyń aldyn alý jáne halyqaralyq terrorızmge qarsy kúres, sondaı-aq uıymdastyrýshylyq, ákimshilik jáne basqa da máseleler.

Buǵan deıin QazAqparat BUU Bas hatshysy Antonıý Gýterrıshtiń Bolashaq sammıti týraly maqalasyn jarııalaǵan bolatyn.