Nıý-Iork turǵyndary turmystyq zorlyq-zombylyqty qylmys dep sanaıtyn zańǵa qoldaý bildirdi

ASTANA. KAZINFORM —Nıý-Iorkte Qazaqstandaǵy áıel quqyǵy men turmystyq zorlyq-zombylyqty qylmys dep sanaıtyn zańdy qoldaýǵa arnalǵan mıtıng ótti.

Nıý-Iorktegi Taıms-skverge búkil TMD elderiniń máselesine aınalǵan turmystyq zorlyq-zombylyq taqyrybyna beı-jaı qaramaıtyn otandastarymyz, sondaı-aq AQSh, Reseı, Belarýs, Qyrǵyzstan, Tájikstan, Túrikmenstan jáne Ózbekstan azamattarynan 100-ge jýyq adam jınaldy.

Nıý-Iorktegi sharany uıymdastyrýshylar – áıelder quqyǵyn qorǵaýshy otandastarymyz: Dınara Janpeıisova men Ásel Darybaeva.

Dınara Janpeıisova Nıý-Iorktegi mıtıngtiń maqsatyn aıtty. Osylaısha, narazylyq bildirýshiler Qazaqstanda turmystyq zorlyq-zombylyqty qylmystyq jaýapqa tartý týraly zańnyń qabyldanýyn qoldap, Qazaqstan Respýblıkasynyń Prezıdenti Qasym-Jomart Toqaevtan zańǵa eshqandaı ózgeris engizbeı, qol qoıýyn suraıdy.

Jıynǵa qatysýshylar turmystyq zorlyq-zombylyqtan qaza tapqan Saltanat Núkenovaǵa qatysty sottyń ádil sheshimin talap etti.

Buǵan qosa, narazylyq bildirýshiler 30-dan astam áıeldiń ólimine qatysty qylmystyq isti qaıta qaraýdy talap etip otyr.

Dál qazir San-Frantsıskoda, Mılan, Parıj, Barselona jáne London sııaqty Eýropa qalalarynda joǵaryda atalǵan maqsatqa uqsas mıtıngiler ótýde.