Nıý-Iork temirjolyndaǵy ereýil 300 000 jolaýshy qozǵalysyn toqtatty
ASTANA. KAZINFORM — Nıý-Iork shtatyndaǵy myńdaǵan Long-Aılend temirjol jumysshylary resmı túrde ereýil jarııalap, Amerıka Qurama Shtattaryndaǵy eń qarbalas temirjoldy toqtatty, dep habarlaıdy Kazinform agenttiginiń Vashıngtondaǵy tilshisi.
FOX Business-tiń habarlaýynsha, Nıý-Iork qalalyq tranzıt basqarmasy men bes temirjol kásipodaq koalıtsııasy arasyndaǵy jalaqy boıynsha kelissózder sátsiz aıaqtalǵan. Saldarynan ereýil bastalyp, temirjol shamamen kúnine 300 000 jolaýshyǵa qyzmet kórsetýdi toqtatty.
Nıý-Iork qalasynyń sheneýnikteri tyǵyz qonystanǵan aımaqtaǵy keptelister men kidiristerge baılanysty jolaýshylardy múmkindiginshe qashyqtan jumys isteýge shaqyrdy.
Ekonomıkalyq belsendiliktiń tómendeýine baılanysty temirjoldyń úzilýi aımaqtyq ekonomıkaǵa kúnine 61 mıllıon dollarǵa deıin shyǵyn ákelýi múmkin.
Aıta keteıik, Long-Aılend temirjolynyń ereýili 1994 jyldan bergi alǵashqy ereýil. Kásipodaq jetekshileri jańa eńbek sharty boıynsha kelissózder júrip jatqan kezde jumysshylardyń jalaqysyn úsh jyldan astam ýaqyt boıy kótermegenin aıtty.
Buǵan deıin Nıý-Iorkte toqpen júretin áýe taksıi tanystyrylǵany belgili boldy.
