Nıý-Iork polıtsııasynda qyzmet etip júrgen qazaq jigitteri kimder
ASTANA. KAZINFORM — AQSh-tyń Nıý-Iork qalasynyń polıtsııa departamentinde etnıkalyq qazaqtar qyzmet atqaryp júr.
Qazaqstannyń Іshki ister mınıstrliginiń habarlaýynsha, Nıý-Iork polıtsııasynda qyzmet etetin qazaqtardyń biri — Mıras Búkeshev. Ol 2000 jyly Tarazda dúnıege kelgen. Mektepti týǵan qalasynda támamdap, 2018 jyly AQSh-qa qonys aýdarǵan. 2023 jyldan beri Nıý-Iork polıtsııa departamentinde qyzmet atqarady.
Al Danııar Nurtaza AQSh-qa otbasymen birge 2002 jyly kóship barǵan. Ol 2014 jyly Nıý-Iork polıtsııasynyń qataryna qabyldanǵan. Danııar Nurtaza 2015 jyly Nıý-Iork metrosy stantsııalarynyń biriniń mańynda tolǵaǵy bastalǵan áıelge kómektesip, bosandyryp alǵannan keıin kópshilikke tanylǵan. Onyń bul áreketi qoǵam tarapynan joǵary baǵalanyp, tártip saqshysynyń ómiri men qyzmeti týraly derekti fılm de túsirilgen.
Qazaqstannyń ishki ister mınıstri Erjan Sádenov AQSh-qa jumys sapary barysynda Nıý-Iork polıtsııasynda eńbek etip júrgen qazaqtarmen kezdesip, olardyń qyzmeti men kásibı jolyn talqylady. Mınıstr shetelde júrgen otandastardyń jetistigi Qazaqstannyń bedelin arttyrýǵa úles qosatynyn aıtyp, olarǵa alǵys bildirdi.
Eske salaıyq, buǵan deıin eskort vzvodynyń jumysy týraly materıalda Rım Papasy Qazaqstanǵa sapary kezinde barlyq 14 ınspektorǵa jeke medal tabystaǵanyn jazǵanbyz.
