Nıý-Iork polıtsııasy qoldan jasalǵan úshinshi jarylǵysh qurylǵyny anyqtady
ASTANA. KAZINFORM -Jeksenbi kúni Nıý-Iork polıtsııasy kúmándi úshinshi qurylǵynyń tabylǵanyn málim etti. Bul týraly Kazinform agenttiginiń Vashıngtondaǵy menshikti tilshisi FOX News-ke silteme jasap habarlady.
Quqyq qorǵaý organdarynyń qyzmetkerleri kúmándi qurylǵyny Ist-End-avenıý kóshesindegi 81 jáne 82-kósheler aralyǵynda turǵan avtokólikten tapqan. Saperler qaýip deńgeıin teksergenshe, jaqyn mańdaǵy ǵımarattardan adamdar ýaqytsha evakýatsııalandy.
Buǵan deıin senbi kúni tańerteń Ist-End-avenıý men 87-shi Ist-strıt mańynda narazylyq aktsııalary ótken. Bul aýmaq Greısı-menshn — Zoran Mamdanıdiń, ıaǵnı Nıý-Iork meriniń resmı rezıdentsııasyna jaqyn ornalasqan.
FBR-dyń málimetinshe, sol jerde eki qoldan jasalǵan jarylǵysh qurylǵy tabylǵan.
Narazylyq aktsııalarynyń birin ońshyl belsendi, aq násildiń ústemdigin jaqtaıtyn Djeık Leng musylmandardyń kópshilik aldynda namaz oqýyna qarsylyq retinde uıymdastyrǵan. Oqıǵa ornyna qarsy taraptaǵy narazylyq bildirýshiler de jınalǵan. Polıtsııa burysh gazyn qoldanǵannan keıin jaǵdaı shıelenise túsken.
Bılik ókilderiniń aıtýynsha, eki qarsy narazylyq bildirýshi jarylǵysh qurylǵylardy órtep, olardy sherýge qatysýshylarǵa qaraı laqtyrǵan. Kúdiktiler — 18 jastaǵy Emır Balat jáne 19 jastaǵy Ibragım Kaıýmı ustaldy.
Tergeý barysynda jarylǵysh qurylǵy salynǵan kólik kúdiktilerdiń biriniń týysyna tirkelgeni anyqtaldy. Qazir is boıynsha tergeý júrip jatyr.
Osyǵan deıin uly depressııadan beri alǵash ret AQSh-tan ketken adamdar sany kelgenderden kóp bolǵany týraly jazdyq.
