Nıý-Iork pen Nıý-Djersıde sý tasqyny men daýyldan keıin myńdaǵan adam jaryqsyz qaldy
ASTANA. KAZINFORM – AQSh-tyń Nıý-Iork jáne Nıý-Djersı shtattarynda bolǵan sý tasqyny men kúshti daýyl saldarynan myńdaǵan turǵyn jaryqsyz qaldy, dep habarlaıdy Anadolu.
Amerıkalyq BAQ-tyń málimetinshe, nóser jaýyn Nıý-Iorktiń Brýklın jáne Kýıns aýdandarynda sý tasqynyna ákelgen.
Kúshti daýyl saldarynan keıbir aýdandarda qulaǵan aǵashtar kólikterdi zaqymdaǵan.
Sondaı-aq sý basqan joldarda kólikterinde qamalyp qalǵan júrgizýshiler óz betimen shyǵýǵa tyrysqan.
Nıý-Djersı shtatynda 10 myńnan astam adam elektr qýatynsyz qalǵany habarlandy.
Nıý-Iork meri Zohran Mamdanı áleýmettik jelidegi paraqshasynda qalanyń káriz júıesi jaýyn-shashyn kólemin kótere almaı jatqanyn málimdedi.
Ol sondaı-aq sý tasqynynan zardap shekken otbasylarmen kezdeskenin aıtty.
Aıta keteıik, buǵan deıin AQSh-tyń ortalyq bóliginde 50 mıllıon adamnyń tornado qaýpi aımaǵynda turǵany habarlanǵan bolatyn.
