Nıý-Iork meri osydan 30 jyl buryn zorlyq jasady dep aıyptalyp otyr

Nıý-Iork meri Erık Adams kóp jyl buryn merııa qyzmetkerine tıisti dep aıyptalyp otyr. Burynǵy merııa qyzmetkeri ony sotqa berip, Adams 1993 jyly oǵan seksýaldy maqsatta tıiskenin aıtqan, dep habarlaıdy Kazinform agenttigi BBC jańalyqtaryna silteme jasap. 

Merııa ókili Adamstyń onymen qashan kezdeskeni esinde joq ekenin jáne aıyptaýlardy joqqa shyǵarǵanyn aıtty.

Sotqa aryz sársenbi kúni keshke Nıý-Iork shtatynda 2022 jyly qabyldanǵan Adult Survival Act («Zardap shekken eresekter týraly») zańyna sáıkes tústi.

Bul zań shtat zańnamasyna ózgeris engizip, merzimi ótip ketken seksýal qylmys qurbandaryna 2022 jyldyń 24 qarashasynan bastap bir jyl ishinde azamattyq aryz berýge múmkindik berdi.

Aryzdanýshynyń qorǵaýshysy bul zańnyń mańyzyn, kóp áıelge ádildikke jetýge múmkindik beretinin atap ótti.

Adams aıyptalyp otyrǵan kezeńde Nıý-Iork polıtsııasynda qyzmet etken.

Beısenbi tańerteń merııa ókili málimdeme jarııalady.

«Mer ol adamnyń kim ekenin bilmeıdi. Eger olar bir kezderi kezdesken bolsa da esinde joq. Biraq ol basqa adamǵa fızıkalyq zarar keletin áreketke eshqashan barmas edi jáne mundaı kez kelgen aıyptaýdy joqqa shyǵarady», — delingen málimdemede.