Nıý-Iork meri Qazaqstan murasyn dáripteý kúnin jarııalady
NЬıÝ-IORK. KAZINFORM — Manhettenniń qarjy ortalyǵynda Qazaqstannyń Respýblıka kúnine arnalǵan Memlekettik tý kóterý saltanatty rásimi ótti. Bul týraly SІM baspasóz qyzmeti málim etti.
Іs-sharaǵa Nıý-Iork merııasynyń, dıplomatııalyq korpýs ókilderiniń, BUU janyndaǵy QR Turaqty ókildiginiń, Nıý-Iork qalasyndaǵy QR Bas konsýldyǵynyń, sondaı-aq qazaqstandyq dıaspora men jastar ókilderi qatysty.
Bıylǵy rásimniń mańyzyn arttyrǵan oqıǵa — Nıý-Iork merııasynyń elimizdegi Respýblıka kúnine oraı «Qazaqstan murasy kúni» (Kazakhstan Heritage Day) dep jarııalaǵan resmı proklamatsııasynyń tabystalýy boldy.
Nıý-Iork meri Erık Adams qol qoıǵan bul tarıhı qujat Qazaqstanǵa degen qurmet pen qazaqstandyq qaýymdastyqtyń qalanyń mádenı jáne qoǵamdyq ómirine qosqan úlesin tanýdyń belgisi retinde qabyldandy.
Proklamatsııa Qazaqstan men Amerıka Qurama Shtattary arasyndaǵy dostyq baılanystardyń beriktigin aıǵaqtap, Nıý-Iork qalasynyń ózara qurmet pen halyqaralyq seriktestik qaǵıdattaryna adaldyǵyn bildirmek.
Qala ákimshiligi atynan quttyqtaý sóz sóılegen Halyqaralyq ister jónindegi arnaıy keńesshi Charlz Daımond dıasporanyń mádenıetaralyq dıalogty damytýǵa qosqan úlesin atap ótip, AQSh pen Qazaqstan arasyndaǵy yntymaqtastyqty odan ári tereńdetýge qoldaý bildirdi.
Іs-shara barysynda AQSh-ta turatyn qazaqstandyqtardyń róline erekshe nazar aýdaryldy.
Óz sózinde Qazaqstannyń Nıý-Iork qalasyndaǵy Bas konsýly Raýan Tleýlın Nıý-Iork merııasyna yntymaqtastyǵy men qoldaýy úshin alǵys bildirip, proklamatsııanyń tabystalýy Qazaqstan men AQSh arasyndaǵy dostyq pen ózara qurmettiń mańyzdy belgisi ekenin atap ótti.
«Sony» kompanııasynyń aǵa vıtse-prezıdenti Galııa Tleýova jas kásibı mamandardyń Qazaqstannyń halyqaralyq arenadaǵy oń ımıdjin nyǵaıtýdaǵy mańyzyn atap ótip, sheteldegi otandastardyń jetistikteri eldiń jańǵyrý baǵytynyń jalǵasy ekenin aıtty.
Mádenı jáne bilim berý salasyndaǵy yntymaqtastyqty damytý taqyryby Nıý-Iork kınoakademııasynyń (NYFA) aǵa vıtse-prezıdenti Devıd Klaınnyń sózinde erekshe ataldy. Ol Almaty qalasynda Akademııanyń jańa kampýsynyń ashylǵanyn eske salyp, qazaqstandyq jastardyń qatysýymen birlesken jobalardy keńeıtýge daıyn ekenin jetkizdi.
Saltanatty sharaǵa Nıý-Iorkte turatyn amerıkalyq mýzykant Djeff Gersh (Jeff Gersh) erekshe kúı berdi. Ol qazaqtyń ulttyq aspaby — dombyrany meńgergenin pash ete otyra, óziniń oryndaýynda qazaqtyń dástúrli mýzykalyq týyndylaryn usyndy.
Qazaq dıasporasy ókili, «Viva Music Carnegie Hall — 2022» baıqaýynyń jeńimpazy Gúlzar Gabman (Gulzar Gabman) qazaq ánderimen jurt qoshemetine ıe boldy. Shara barysynda shyrqalǵan áýender eki el arasyndaǵy mádenı ózara is-qımyl men dostyqtyń shynaıy kórinisine aınaldy.
Eske sala keteıik, QR Syrtqy ister mınıstriniń Máskeýge resmı sapary bastaldy.