Nıý-Iork meri qyzmetine kim úmitker
ASTANA. KAZINFORM — 2025 jyldyń 4 qarashasynda ótetin saılaýda Nıý-Iork qalasynyń meri qyzmetine úsh úmitker talasady, dep habarlaıdy Kazinform menshikti tilshisi.
Demokratııalyq partııanyń ókili, Nıý-Iork shtaty zań shyǵarý jınalysynyń múshesi, 33 jastaǵy Zohran Mamdanı 24 maýsymda partııaishilik saılaýda senimdi túrde jeńiske jetip, Nıý-Iork shtatynyń burynǵy gýbernatory Endrıý Kýomodan (2011–2021) 13 paıyzdyq tarmaqqa ozyp ótti.
Ol saılaýshylardyń nazaryn baspanany qoljetimdi, avtobýstardy tegin etý, páterlerdi jalǵa alý jáne qalalyq azyq-túlik dúkenderindegi baǵany baqylaý týraly ýádelerimen tartty. Qarsylastary onyń úkimettegi shekteýli tájirıbesine jáne Izraıldi synaýyna qatysty alańdaýshylyq bildirdi.
«Guardian Angels» kompanııasynyń negizin qalaýshy jáne bas dırektory 71 jastaǵy Kertıs Slıva Respýblıkalyq partııanyń atynan úmitker bolady. Ol WABC konservatıvti radıostantsııasynda baǵdarlama júrgizedi jáne ondaǵan jyl boıy azamattardy baqylaý tobyn basqarǵan Guardian Angels-ti basqaryp otyr. Ol merdiń kóshi-qon daǵdarysyna baılanysty áreketterin synap, jańa baspanalardyń ashylýyna qarsy shyqty.
Nıý-Iorktiń burynǵy gýbernatory 67 jastaǵy Endrıý Kýomo saılaýǵa táýelsiz kandıdat retinde túsedi.
Demokratııalyq partııanyń praımerızi kezinde ol shtat gýbernatory retinde jetistikterine nazar aýdartty, sonyń ishinde iri ınfraqurylymdyq jobalardyń aıaqtalýy jáne eń tómengi jalaqyny kóterý bar. Ol ekinshi oryn aldy jáne jalpy saılaýǵa úshinshi partııadan kandıdat retinde qatysýdy josparlap otyr.
Shtat sııaqty Nıý-Iork qalasyn da tarıhı túrde Demokratııalyq partııanyń ókilderi basqarǵan, ıaǵnı Zohran Mamdanı men Endrıý Kýomo elektorat tarapynan Kertıs Slıvadan artyqshylyqqa ıe bolady.
Olardyń bir partııaǵa múshe bolýyna qaramastan, Donald Tramp respýblıkashyl Kertıs Slıvanyń Nıý-Iork qalasynyń meri retinde kandıdatýrasyn qoldaǵan joq. Fox & Friends baǵdarlamasynyń efırinde prezıdent onyń jeńiske jetý múmkindigine kúmán keltirip, tipti kandıdattyń jeke qalaýyn kelemejdedi.
— Men respýblıkashylmyn, biraq Kertıs praım-taım úshin laıyqsyzdaý. Ol Greısı jekejaıynda mysyqtardy qalaıdy… Bizge myńdaǵan mysyq kerek emes, — dedi Tramp «Fox & Friends» baǵdarlamasynda.
Slıva men onyń áıeli páterde qutqarylǵan 15 mysyqpen birge turyp jatyr. Tramp pikirinshe, kandıdattyń demokrat Zohran Mamdanımen básekelesýge yqpaly men bedeli joq.
Manhetten ınstıtýty (bıylǵy jyldyń 10-16 maýsymy) jáne Emerson kolledji (bıylǵy jyldyń 23-26 mamyry) júrgizgen saýalnamalary boıynsha, Zohran Mamadanı sáıkesinshe 33% jáne 35% daýys jınaǵan. Ekinshi orynda Kertıs Slıva tur — 16%-16%.
Aq úı Demokratııalyq partııanyń saıasaty bolatyn DEI konstıtýtsııalyq emes prıntsıpterine negizdelmegenin qamtamasyz etý úshin Nıý-Iork qalasynyń ınfraqurylymyn qarjylandyrýǵa 18 mıllıard dollardy toqtatady dep buryn habarlanǵan bolatyn.
Buǵan deıin Aq úı Nıý-Iork ınfraqurylymyna josparlanǵan 18 mlrd dollardy toqtatatynyn jazǵan bolatynbyz.