Nıý-Iork áýejaıynda jolaýshylar ushaǵy órt sóndirý kóligine soqtyǵysty

ASTANA. KAZINFORM — Air Canada áýe kompanııasynyń Bombardier CRJ-900 laıneri Nıý-Iorktiń La-Gýardııa áýejaıyna qoný kezinde órt sóndirý kóligin soqty, dep habarlaıdy DW.

Oqıǵa jergilikti ýaqyt boıynsha shamamen 23:40-ta boldy. The New York Post gazetiniń habarlaýynsha, kem degende eki órt sóndirýshi aýyr jaraqat aldy.

Ushaqta shamamen 100 jolaýshy bolǵan. Olardy evakýatsııalady, jolaýshylar arasynda zardap shekkender bar-joǵy ázirge belgisiz.

Oqıǵa ornynan túsken sýretterde ushaqtyń aldyńǵy bóligi qatty zaqymdanǵany kórinedi. Soqtyǵysý ushý-qoný jolaǵynda qatty jańbyr jaýyp, kóriný nashar bolǵan kezde boldy.

Qazir La-Gýardııa áýejaıy jabyq, keletin reıster basqa áýejaılarǵa baǵyttaldy. Áýejaı tek jergilikti ýaqyt boıynsha 18:00-de qaıta ashylýy múmkin dep habarlandy.

Budan buryn Parsy shyǵanaǵynda Qatar áskerı tikushaǵy apatqa ushyrap, jeti adam qaza tapqanyn jazǵan bolatynbyz.