Nıý-Iork AQSh-ta evtanazııaǵa ruqsat bergen 14-shtat boldy
ASTANA. KAZINFORM — AQSh-tyń Nıý-Iork shtatynda aıyqpas dertke shaldyqqan naýqastarǵa evtanazııa jasaýǵa resmı túrde ruqsat berildi. Bul týraly Belta habarlady.
Gýbernator Ketı Hokýl tıisti zańǵa qol qoıdy. Qujat ómir súrý uzaqtyǵy alty aıdan aspaıdy dep boljanǵan naýqastarǵa qatysty qoldanylady
Zańǵa sáıkes, aıyqpas dıagnozy rastalǵan, 18 jasqa tolǵan, aqyl-esi durys ári dáriger taǵaıyndaǵan preparatty óz betinshe qabyldaı alatyn Nıý-Iork turǵyndary ómirden óz erkimen ketýge arnalǵan arnaıy dári-dármekti alýǵa ótinish bere alady.
Qujatta bul quqyqty paıdalaný úshin qatań talaptar belgilengen. Atap aıtqanda, ótinish berýshi Nıý-Iork shtatynda turaqty turýy jáne psıhıkalyq jaǵdaıyna qatysty arnaıy tekserýden ótýi qajet.
Basylymnyń jazýynsha, bul AQSh-ta evtanazııaǵa qatysty qabyldanǵan eń qatań zańdardyń biri sanalady.
Zań kúshine engennen keıin Nıý-Iork evtanazııany zańdastyrǵan AQSh-tyń 14-shtaty boldy.
Eske salaıyq, buǵan deıin Latyn Amerıkasynda evtanazııany birinshi bolyp Ýrýgvaı zańdastyrǵanyn jazǵanbyz.
