Nıý-Delıde bir mıllıon qańǵybas ıt qaıtadan kóshege shyǵaryldy

NЬıÝ-DELI. KAZINFORM — Úndistannyń Joǵarǵy soty Nıý-Delı qalasyndaǵy shamamen bir mıllıon qańǵybas ıttiń qala kóshelerinde erkin júrýine ruqsat berdi, dep jazdy Kazinform agenttigi CNN-ge silteme jasap.

Buǵan deıin qalada ıtterdiń adamdarǵa shabýyl jasaǵany týraly alańdatarlyq jaǵdaılar tirkelgen bolatyn. Balalardy ıt talap, óltirgen jaǵdaılar da bar. Osyǵan baılanysty, 12 tamyz kúni Joǵarǵy sot barlyq qańǵybas ıtterdi segiz aptanyń ishinde ustap, turaqty túrde prııýttarǵa ornalastyrý týraly sheshim shyǵarǵan edi.

Alaıda bul sheshimge zooqorǵaýshylar qarsy shyqty. Olar qalanyń mundaı kólemdegi janýarlardy ornalastyrýǵa qajet ınfraqurylymnan jurdaı ekenin málimdegen. Sarapshylardyń esebi boıynsha, Nıý-Delıde 1 mıllıonǵa jýyq qańǵybas ıt bar.

Synnan keıin Joǵarǵy sot óz sheshimin qaıta qarap, jańa qaýly qabyldady.

Jańa sheshimge sáıkes:

• Qańǵybas ıtter ustalyp, sterılızatsııa jáne vaktsınatsııa jasalady;

• Odan keıin sol ustalǵan aýdanyna qaıta jiberiledi;

• Tek qutyrý nemese agressıvtilik belgileri bar ıtter ǵana kóshege jiberilmeıdi.

Sonymen qatar, Joǵarǵy sot bul sheshimniń eldiń barlyq óńirine qatysty ekenin naqtylady. Buǵan qosa, ıtterge kóshede tamaq berýge tyıym salyndy jáne olardy qorektendirýge arnaıy oryndar uıymdastyrý usynyldy.

Derekterge súıensek:

• Press Trust of India málimeti boıynsha, Úndistanda 62 mıllıonǵa jýyq qańǵybas ıt bar;

• DSU (Dúnıejúzilik densaýlyq saqtaý uıymy) Úndistandy qutyrý indeti boıynsha endemııalyq el retinde sanaıdy – bul elde álemdegi qutyrýdan bolatyn ólim-jitimniń 36%-y tirkeledi.

Eske sala ketsek, buǵan deıin Eýroodaq barlyq mysyq pen ıtke chıp ornatýdy josparlap otyrǵanyn habarlaǵan edik.