NYT: Tramp pen Epshteın 15 jyl boıy dostyq qarym-qatynasta bolǵan

ASTANA. KAZINFORM — AQSh prezıdenti Donald Tramp pen kámeletke tolmaǵandardy azǵyrdy dep aıyptalǵan amerıkalyq qarjyger Djeffrı Epshteın shamamen 15 jyl boıy dos bolǵan, dep jazady The New York Times.

Olar 1990 jyldardyń shamasynda tanysqan. Sol kezde Epshteın Florıdadaǵy Tramptyń Mar-a-Lago rezıdentsııasyna jaqyn mańnan úı satyp alǵan. Ekeýi jıi aralasqan, bir-biriniń úılerine qonaqqa barǵan, túrli keshter uıymdastyryp, oǵan modelderdi shaqyrǵan.

Olardyń dostyǵy shamamen 2004 jyly toqtaǵan. Qarym-qatynastyń úzilýine sebep — ekeýiniń de Florıdadaǵy Palm-Bıch jaǵalaýyndaǵy bir záýlim úıdi satyp alǵysy kelgeni. Bul múliktik básekede Tramp jeńiske jetip, úıdi 41 mıllıon dollarǵa satyp alǵan.

NYT málimetine qaraǵanda, Tramp keıin jaqyn aınalasyna Epshteınnen alystap ketýiniń taǵy bir sebebin aıtqan. Belgili bolǵandaı, Epshteın Mar-a-Lago klýbynyń bir múshesiniń qyzyna orynsyz qylyq kórsetken.

Epshteın 2019 jylǵy 6 shildede Nıý-Iork shtatynda ustaldy. Prokýratýra onyń 2002–2005 jyldary Manhettendegi úıine ondaǵan kámeletke tolmaǵan qyzdardy (eń kishisi 14 jasta) shaqyrǵanyna dálel bar ekenin málimdedi. Epshteınniń dostary men tanystary arasynda AQSh pen ózge elderdiń qazirgi jáne burynǵy sheneýnikteri, burynǵy memleket basshylary, iri kásipkerler men shoý-bıznes juldyzdary bolǵan.

Epshteınge qatysty qylmystyq is 2019 jylǵy 10 tamyzda túrme kamerasynda óz-ózine qol jumsaǵannan keıin toqtatyldy.

Buǵan deıin AQSh Djeffrı Epshteınniń klıentter tizimin jarııalaýdy josparlap otyrǵanyn alǵa tartty.

Al AQSh prezıdenti Donald Tramp The Wall Street Journal basylymyn sotqa beremin dep qorqytyp, Epshteın isiniń keıbir materıaldaryn jarııalaýdy talap etti.