NYT: AQSh-tyń Venesýelaǵa jasaǵan shabýyly saldarynan keminde 40 adam qaza tapty

ASTANA. KAZINFORM — 3 qańtar kúni AQSh-tyń Venesýelanyń astanasy Karakasqa jasaǵan shabýyly saldarynan beıbit turǵyndardy qosa alǵanda, keminde 40 adam qaza tapty. Bul týraly The New York Times gazeti Venesýelanyń joǵary laýazymdy sheneýnigine silteme jasap habarlady.

Onyń málimetinshe, 3 qańtardaǵy AQSh áreketteriniń nátıjesinde Venesýelada «áskerı qyzmetkerler men beıbit azamattardy qosa alǵanda, keminde 40 adam kóz jumǵan».

AQSh prezıdenti Donald Tramp AQSh-tyń Venesýelaǵa aýqymdy soqqylar jasaǵanyn rastady. Sonymen qatar ol respýblıka basshysy Nıkolas Madýro men onyń jubaıynyń ustalyp, elden shyǵarylǵanyn málimdedi.

Eske sala ketsek, AQSh Venesýelaǵa jáne onyń kóshbasshysy, prezıdent Nıkolas Madýroǵa qarsy aýqymdy operatsııany sátti júrgizdi. Nátıjesinde Madýro jubaıymen birge ustalyp, elden evakýatsııalandy.

Venesýela prezıdenti Nıkolas Madýro men onyń áıeli Sılııa Floreske narkoterrorızmge qatysty, atap aıtqanda kokaın ákelý, pýlemetter men jarylǵysh qurylǵylardy saqtaý, AQSh-qa qarsy pýlemetter men jarylǵysh qurylǵylardy ıemdený úshin sóz baılasý aıyptary taǵyldy.

Al Ulybrıtanııa premer-mınıstri Kır Starmer óz eliniń AQSh-tyń Venesýeladaǵy áskerı operatsııaǵa eshqalaı aralaspaǵanyn málimdedi.

Áskerı operatsııadan soń Donald Tramp AQSh Venesýelany basqaratynyn aıtty. Al Venesýela vıtse-prezıdenti Delsı Rodrıges AQSh-tan Nıkolas Madýrony dereý bosatýdy talap etip, «Venesýela eshbir eldiń otary bolmaıdy» dep málimdedi. 

Qazirgi tańda Madýro men onyń jubaıy arnaıy ushaqpen Nıý-Iork shtatyna jetkizilip, ýaqytsha tergeý ızolıatoryna qamaldy.