NYT: AQSh pen Iran mámileniń negizgi sharttary boıynsha kelisimge keldi
ASTANA. KAZINFORM – Vashıngton men Tegeran Ormýz buǵazy arqyly keme qatynasyn qaıta ashýdy kózdeıtin mámile boıynsha ortaq kelisimge keldi. Bul týraly derekkózderge silteme jasaǵan The New York Times habarlady.
Alaıda basylymnyń jazýynsha, buǵaz arqyly teńiz qatynasy naqty qashan qaıta jandanatyny jáne munaı baǵasynyń qashan tómendeıtini ázirge belgisiz.
Sonymen qatar kelisim jasalǵan jaǵdaıda Iran sý jolyn qandaı formatta baqylaýda ustaıtyny da naqtylanbaǵan, dep jazady NYT.
Buǵan deıin Fox News arnasy da Irannyń negizdemelik kelisimge prıntsıptik túrde keliskenin jáne taraptardyń qujattyń 95 paıyzyn daıyndap qoıǵanyn habarlaǵan-dy.
Arna málimetinshe, AQSh prezıdenti Donald Tramp kelisim boıynsha jumysty tolyq aıaqtaý úshin taǵy bes-jeti kún ýaqyt berýi múmkin.
AQSh prezıdenti buǵan deıin Iranmen jasalatyn kelisimderdiń áli tolyq kelisilmegenin málimdegen edi. Sondaı-aq ol ókilderine Tegeranmen mámile jasaýǵa asyqpaý jóninde tapsyrma bergenin aıtty.
Eske sala ketsek, 19 mamyr kúni Tramp Iranǵa josparlanǵan shabýyldy toqtatty.
Sondaı-aq Tramp Irandaǵy jaǵdaıǵa baılanysty ulynyń úılený toıyna qatyspaýy múmkin ekenin jazdyq.
