Nysanbaev: Brakonerlerdiń kıikterdi atýy tyıylar emes
Bul týraly búgin QR Parlamenti Májilisinde ótip jatqan «Ósimdikter men janýarlar dúnıesin qorǵaýdyń, ósimin molaıtýdyń jáne olardyń obektilerin ornyqty paıdalanýdyń ózekti máseleleri» taqyrybynda ótip jatqan «dóńgelek ústel» barysynda QR Aýyl sharýashylyǵy vıtse-mınıstri Erlan Nysanbaev málim etti, dep habarlaıdy QazAqparat.
«Jabaıy tuıaqty janýarlardyń sırek kezdesetin jáne joıylyp bara jatqan túrleri men kıikterdi saqtaý, olardyń sanyn qalpyna keltirý boıynsha jumystar júrgizilip jatyr. Alańdatýshylyq týdyratyn basty nysandardyń biri jabaıy dala antılopasynyń biregeı túri kıikter bolyp otyr. Bul janýarlardyń dúnıejúzilik taralymynyń 95 paıyzy Qazaqstan aýmaǵynda mekendeıdi. Kıikterdi qorǵaýdyń nátıjesinde olardyń sany 21 myń bastan 295 myń basqa deıin kóbeıgen bolatyn. Biraq, ókinishke oraı, 2015 jyly kıikterdiń qyrylyp qalýy oryn alyp, ústimizdegi jyly esepke alý qorytyndylary boıynsha, olardyń sany shamamen 108 myń basty quraıdy. Qyrylý sebebi juqpaly aýrý - pasterellez. Jappaı ólim-jitimge ushyraýdyń mundaı faktisi buryn da oryn alǵan», - dedi vıtse-mınıstr.
Onyń atap ótýinshe, kıikter sanynyń azaıýyna brokenerlik te áser etip otyr.
«2010-2016 jyldary kıik atýdyń jáne olardyń múıizderin satýdyń 318 faktisi tirkeldi. Jabaıy janýarlardyń sırek kezdesetin jáne joıylyp bara jatqan túrleri men kıikterdi qorǵaýmen «Ańshylyqzooónerkásip» uıymy aınalysady. Monıtorıng uıymdastyrý jáne kıikterdi spýtnıktik radıomaıaktarmen tańbalaý paıdalanylady. Qorǵaý sharalaryn uıymdastyrý ınspektorlardyń kólikterinde ornatylǵan spýtnıktermen baqylanady. Qoldanylǵan sharalardyń nátıjesinde Jabaıy tuıaqty janýarlardyń sırek kezdesetin jáne joıylyp bara jatqan túrleri men kıikter sanynyń kóbeıip kele jatqany baıqalady», - dedi Nysanbaev.