Nysanaly transfertterdi paıdalaný boıynsha ákimderdiń esebi tyńdalady - Áset Erǵalıev
«Bıýdjet qarajatyn paıdalaný tıimdiligin arttyrý maqsatynda aýdıtorlyq esep nátıjeleri boıynsha zańnamada belgilengen maqsattarǵa paıdalanylmaǵan nysanaly aýdarym somalaryn 3 aı ishinde respýblıkalyq bıýdjetke qaıtarý kózdeledi», - dedi mınıstr.
Onyń aıtýynsha, jergilikti atqarýshy organdarǵa jergilikti bıýdjettiń qolma-qol aqsha tapshylyǵyn jabýǵa qaryzdar bólý merzimin 3 jyldan 6 aıǵa deıin qysqartý usynylady. Bul jergilikti atqarýshy organdardyń jergilikti bıýdjettiń kiris bóligin ulǵaıtýdaǵy yqpalyn arttyrýy tıis.
Budan bólek, eseptilikti jetildirý aıasynda 2024 jyldan bastap «Shottardyń biryńǵaı jospary» jańa quralyn engizý usynylyp otyr.
«Bıýdjettiń atqarylýy týraly jyldyq esepti jetildirý aıasynda, strategııalyq josparlar men óńirlerdi damytý baǵdarlamalarynyń iske asyrylýy týraly esepterdiń negizinde bıýdjettiń shyǵystary týraly analıtıkalyq esepti qalyptastyrý kózdelip otyr. Sonymen qatar, Parlamentte jyldyq esepti qaraý kezinde respýblıkalyq bıýdjetten beriletin nysanaly transfertterdi paıdalaný boıynsha ákimderdiń esebin tyńdaý kózdeledi. Bul jergilikti atqarýshy organdardyń nysanaly transfertterdi paıdalaný boıynsha jaýaptylyǵyn arttyrýǵa múmkinshilik beredi», - dedi Áset Erǵalıev.
Budan buryn habarlanǵandaı, Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine bıýdjet zańnamasyn jetildirý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.
Qujatta bıýdjettik táýekelder men memlekettik qarjynyń turaqtylyǵy týraly esepti jyl saıyn Parlamentke respýblıkalyq bıýdjettiń jobasymen engizý usynyldy.
