Nyǵmet Nurmaqovtyń ómiri kimge bolsa da úlgi bolatyn ómir - Jumabek Ashýuly
ALMATY. Sáýirdiń 20-sy. QazAqparat /Názıra Eleýhan/ - Búgin Almatyda kórnekti memleket jáne qoǵam qaıratkeri Nyǵmet Nurmaqovtyń týǵanyna 115 jyl tolýyna arnalǵan "Elim dep soqqan júregi" atty dóńgelek ústel otyrysy ótti,
dep habarlaıdy QazAqparat.
Almaty qalasy ákimdigi jáne Saıası qýǵyn-súrginge ushyraǵandar qaýymdastyǵynyń uıymdastyrýymen ótken dóńgelek ústelge belgili tarıhshylar, qoǵam qaıratkerleri, stýdentter men oqýshylar qatysty. Onyń ishinde Nyǵmet Nurmaqovtyń ómirbaıanyn zerttep, ol týraly kitap jazǵan tarıh ǵylymynyń kandıdaty, dotsent Bolat Qabdóshev, Álıhan Bókeıhanovtyń urpaǵy, búgingi qoǵamymyzdyń qaıratkeri Syrym Bókeıhanov, sondaı-aq kezinde Ulttyq qaýipsizdik komıtetiniń jasyryn muraǵatynda qyzmet jasaǵan, Nyǵmet Nurmaqov týraly derekterdi jetkizgen Bolatbek Násenov bar.
«Ótken ǵasyrdyń 20-shy 30-shy jyldary Keńes Odaǵy kezinde myńdaǵan asyl azamattar ozbyr júıeniń qurbandaryna aınalǵany bárimizge belgili. Sol jyldary Nyǵmet Nurmaqovty da ashyq pikirin aıtqany úshin «halyq jaýy» degen jasandy jala taǵyp, ustady. Onyń ómiri kimge bolsa da úlgi bolatyn ómir. Ol Goloşekınniń qate jolyn, saıasatynyń durys emes ekendigin betine basyp, dáleldep, ustasyp ótken jáne Máskeýlik ortalyqtyń adýyndy óktem saıasatyna barynsha tabandalyq tanytyp, qarsy turyp, kóbinde óziniń kóregen saıasatker, bilikti úkimet basshysy ekenin dáleldeı bilgen azamat bolǵan. Sondyqtan, onyń ómirin nasıhattap, týǵan kúnin atap ótý, bizdiń keleshek urpaq úshin kerek. Tarıhty bilý, sol kezde memleketti, eldi basqarǵan azamattardyń ómirimen tanysý - bizdiń jas urpaǵymyzǵa úlken sabaq bolary anyq. Búgingi sharany uıymdastyrýdaǵy maqsatymyz da - jastarǵa tárbıe berý», dedi Saıası qýǵyn-súrginge ushyraǵandar qaýymdastyǵynyń tóraǵasy Jumabek Ashýuly.
Nyǵmet Nurmaqov Semeı oblysy Qarqaraly ýezine qarasty Qý bolysynda týǵan. Qarqaralydaǵy orys-qazaq ýchılışesin, Omby muǵalimder semınarııasyn, odan keıin, Máskeý qalasyndaǵy Kommýnıstik ýnıversıtetti bitirgen. Ol totalıtarlyq júıeniń qurbany boldy. Oǵan nebary qyryq eki jasynda «halyq jaýy» degen aıyp taǵylyp, 1937 jyly qyrkúıekte atý jazasyna kesildi. Kórnekti memleket jáne qoǵam qaıratkeri 1956 jyldyń tamyz aıynda aqtaldy.
